मन्त्रिपरिषदलाई पूर्णता दिन बसेको गठबन्धनको बैठक अनिर्णित

१४ चैत्र, काठमाडौं । मन्त्रिपरिषदको भागबण्डा टुंग्याउन बसेको सत्ता गठबन्धनको बैठक बिनानिर्णय सकिएको छ । बैठकमा यूनतम साझा कार्यक्रमको खाका प्रस्तुत भएको छ । दलबीच मन्त्रालय भागबण्डामा सहमति हुन नसकेपछि भोलि बिहान ९ बजे बस्नेगरी बैठक सकिएको हो ।

बैठकमा राजनीतिक दलहरूले आफूले पाउनुपर्ने मन्त्रालय संख्या दाबी गरेका छन् । प्रधानमन्त्री निवास बालुवाटारमा मंगलबार साँझ बसेको बैठकमा गठबन्धन दलहरूले पार्टीका तर्फबाट मन्त्रालय संख्या दाबी गरेका हुन् । बैठकमा गठबन्धनको प्रमुख दल कांग्रेसले नौ मन्त्रालयमा दाबी गरेको छ । त्यस्तै, जनता समाजवादी पार्टी र एकीकृत समाजवादीले तीन÷तीन मन्त्रालय आफूले पाउनुपर्ने दाबी गरेका छन् ।

लोकतान्त्रिक समाजवादी पार्टीले दुई मन्त्रालय दाबी गरेका छन् । प्रतिनिधिसभामा कांग्रेस सबैभन्दा ठूलो पार्टी हो । सत्तारुढ गठबन्धनमा रहेका पार्टीहरूका प्रतिनिधिसभामा कांग्रेसका ८८, माओवादी केन्द्रका ३२, जसपाका ११, एकीकृत समाजवादीका १०, लोसपाका चार सांसद छन् । सत्तरुढ गठबन्धनको बैठकमा सरकारको न्यूनतम साझा कार्यक्रममाथि केहिबेर छलफल भएको थियो ।