काठमाडौंका कुन-कुन क्षेत्रमा आज सवारी आवागमन प्रभावित हुँदैछ ?

१६ चैत्र, काठमाडौं । सेतो मच्छिन्द्रनाथको रथ जात्राका कारण काठमाडौंका केही स्थानमा आज पनि सवारी आवागमन प्रभावित हुने भएको छ । रथ यात्रा हुने सडकमा सबै प्रकारका सवारीसाधनहरूलाई प्रवेश निषेध गरिएको महानगरले जनाएको छ ।

आज चैत १६ गते असन, केलटोल, इन्द्रचोक, मखन, हनुमाढोका दरबार परिसर क्षेत्रको सवारी आवागमन प्रभावित हुनसक्ने महानगरपालिकाले जनाएको छ । चैत १७ गते हनुमानढोका दरबार परिसर, मरू टोल, चिकँमुगल, जैसीदेवल, ज्याबहाल, लगन चोकमा रथयात्रा हुनेछ ।

महानगरका अनुसार चैत १८ गते लगन चोक र १९ गते लगन चोक दलाछि ह्युमत जैसीदेवल कोहिटी भीमसेनस्थान मरु टोलमा रथ यात्रा हुने भएकाले रथयात्राको समय उक्त क्षेत्रमा कुनै पनि प्रकारका सवारी प्रवेश गर्न दिइने छैन ।

बुधबारदेखि सुरु भएको सेतो मच्छिन्द्रनाथको रथयात्रा आइतबारसम्म चल्नेछ। चैत्र शुक्ल अष्टमी अर्थात् हरेक वर्ष चैते दशैंको दिनदेखि सेतो मच्छिन्द्रनाथको रथयात्रा सुरु हुने गर्छ ।