एसईई परीक्षाको सुरक्षार्थ खटेका एक असईको मृत्यु

१७ चैत, जनकपुरधाम। महोत्तरीमा माध्यमिक शिक्षा परीक्षा ‘एसईई’ को सुरक्षार्थ खटेका एक असईको मृत्यु भएको छ । आज बिहान ८ बजेबाट सुरु भएको यस वर्षको एसइई परीक्षा केन्द्र बलवा नगरपालिका वडा नं। १० धमौरा माविमा सुरक्षार्थ खटिएका असई ललन कुमार राय पटेलको मृत्यु भएको हो ।

अचानक स्वास्थ्य अवस्था खराब भएपछि उनको प्रादेशिक अस्पताल जनकपुरमा उपचारको क्रममा मृत्यु भएको महोत्तरी प्रहरीले जनाएको छ । प्रहरीका अनुसार उनी गौर नगरपालिक-२ का बासिन्दा हुन्।

परीक्षा सुरक्षार्थ खटिएका उनको आज बिहान ९ बजेर २५ मिनेटमा मृत्यु भएको थियो । मृत्युपछि पोस्टमार्टम गरी उनको शव परिवारजनको जिम्मा लगाइएको प्रहरीले जनाएको छ ।