सुन तोलाको ७२ हजार ५ सय !

१७ भदौं काठमाडौं । सुनको भाउ तोलामा ५ सय रुपैयाँ बढेकोे छ । सोमबार स्थिर रहेको सुनको भाउ मंगलबार तोलामा ५ सय रुपैयाँ बढेर तोलाको ७२ हजार ५ सय रुपैयाँ निर्धारण गरिएको नेपाल सुनचाँदी व्यवसायी महासंघले जनाएको छ ।

यसअघि गत भदौ ९ सुनको भाउले नयाँ कृतिमान बनाउदै प्रतितोला ७३ हजार ५ सय रुपैयाँमा कारोबार भएको थियो । यस्तै, चाँदीको मूल्य पनि मंगलबार प्रतितोला ८९५ रुपैयाँ पुगेको छ । निरन्तर भाउ बढेपछि सर्वसाधारणले सुनका गहना खरिद गर्न कठिन हुने अवस्था आइसकेको छ । आम उपभोक्ताले आफूसँग भएको गहना बेच्न चाहे पनि सुनचाँदी व्यापारी खरिद नगरेको गुनासो गरिरहेका छन् ।

सुनचाँदी गहन पसल सुनसान छन् । व्यापारीहरुले ग्राहकका पुराना गहना किन्न मानिरहेका छैनन् ।अन्तर्राष्ट्रिय बजारमा सुनको मूल्य प्रतिऔंस न्युनतम १५ सय २२.०८ डलर देखि अधिकतम १५ सय २९.८७ डलर सम्म कारोबार भएको छ । अन्तर्राष्ट्रिय बजारमा भाउ चुलिए सँगै यसको प्रत्यक्ष असार नेपालमा पनि परेको हो ।

पछिल्लो समय सुनको मूल्य बढ्नुमा अमेरिका र चीनबीच बढ्दो व्यापार युद्ध मुख्य कारण रहेको व्यापारीहरु बताउँछन् । नेपालमा सुनको भाउ अन्तर्राष्ट्रिय बजारका आधारमा निर्धारण हुन्छ ।