‘एक्सन रुम’बाटै माथिल्लो त्रिशूली ‘थ्री’ को उदघाटन हुँदै

२ मंसिर काठमाडौं । प्रधानमन्त्री केपी शर्मा ओलीले सिहदरबारको ‘एक्सन रुम’बाटै माथिल्लो त्रिशूली थ्री ‘ए’ ६० मेगावाट क्षमताको जलविद्युत् आयोजनाको उद्घाटन गर्ने भएका छन् ।

प्रधामन्त्री ओलीले सिंहदरबारको एक्सन रुमबाट र ऊर्जामन्त्री वर्षमान पुनले नुवाकोटको किस्पाङ गाउँपालिका–५ सिम्लेस्थित आयोजनास्थलबाटै विद्युत् आयोजनाको उद्घाटन गर्न लागेका हुन्। गएको चैतदेखि नियमित विद्युत् उत्पादन सुरु भएपनि आयोजनाको औपचारिक रूपमा उद्घाटन हुन लागेको हो ।

आयोजनाबाट हिउँदको बेला ४५ मेगावाट र अरु बेला ६० मेगावाट विद्युत् उत्पादन हुनेछ। आयोजना विद्युत् प्राधिकरण आफैँले निर्माण गरेको हो । १२ अर्ब ६० करोड रुपैयाँ लागतमा निर्माण भएको आयोजना नेपाल सरकार एवम् प्राधिकरणको लगानी र चिनियाँ आयात निर्यात बैंकको सहुलितपूर्ण ऋणमा निर्माण भएको हो ।

प्राधिकरणका कार्यकारी निर्देशक कुलमान घिसिङका अनुसार आयोजनाबाट अबको नौं महिना पूर्ण क्षमतामा विद्युत् उत्पादन हुनेछ। यस्तै हिउँदका तीन महिना आयोजनाले ४५ मेगावाट विद्युत् उत्पादन गर्नेछ। आयोजनाले विद्युत् बिक्रीबाट वार्षिक करिब पाँच अर्ब रुपैयाँ आम्दानी गर्ने बताइएको छ ।

आयोजनाबाट उत्पादित विद्युत् त्रिशूली काठमाडौँ २२० केभी क्षमताको प्रसारण लाइनमार्फत राष्ट्रिय प्रसारण प्रणालीमा जोडिएको छ। प्राधिकरणका कार्यकारी निर्देशक कुलमान घिसिङले गत जेठ २ गते नै आयोजना विद्युत् राष्ट्रिय प्रसारण लाइनमा जोडिएको घोषणा गरेका थिए ।