कोरोनाको संक्रमण फैलिन नदिन घरबाटै काम गर्न ट्वीटरकाे आग्रह

२० फागुन काठमाडौं । कोरोना भाइरस ‘कोभिड–१९’ बाट विश्वका विभिन्न ७६ देशमा गरी मंगलबार बिहानसम्म ९० हजार भन्दा बढीमा कोभिड–१९ को संक्रमण देखिएको छ ।

चीनको हुवाई प्रान्तबाट फैलिएको भाइरसबाट आज बिहानको ताजा अपडेट अनुसार ३ हजार एक सय २५ जनाको मृत्यु भएको छ । ४८ हजारभन्दा बढी निको भएको विश्व स्वास्थ्य संगठनले जानकारी दिएको छ ।

यता कोरोना भाइरसको संक्रमण फैलिन नदिनका लागि सामाजिक सञ्जाल ट्वीटरले सावधानी अपनाएको छ । ट्वीटरले आफ्ना कर्मचारीलाई कोरोनाको संक्रमण रोक्ने प्रयास स्वरुप घरबाटै काम गर्न आग्रह गरेको छ । सामाजिक सञ्जाल ट्वीटरले ब्लग पोस्ट गरेर हङकङ, जापान र दक्षिण कोरियाका कर्मचारीलाई घरबाट काम गर्नु अनिवार्य रहेको जनाएको छ ।

यस्तै ट्वीटरले विश्वभर रहेका आफ्ना पाँच हजार कर्मचारीलाई पनि सकेसम्म घरबाटै काम गर्न प्रोत्साहित गरेको छ। एक दिनअघि ट्वीटरले आफ्ना कर्मचारीलाई अत्यावश्यक बाहेकका व्यवसायिक यात्रा तथा कार्यक्रमहरुका सहभागी नहुन भनेको थियो ।