कोही कसैसँग हात नमिलाउन देउवाको आग्रह

२१ फागुन, काठमाडौं । संसारभर फैलँदो क्रममा रहेको कोरोना भाइरसको असर नेपालमा पनि आउने उच्च जोखिम रहेको भन्दै पूर्वप्रधानमन्त्री एवं नेपाली कांग्रेसका सभापति शेरबहादुर देउवाले सभा सम्मलेलनमा सहभागी हुने, भिडभाडमा जाने र साथीभाइका बिच भेट हुँदा हात मिलाउने जस्ता कार्यहरु नगर्न आग्रह गरेका छन् । कोरोना भाइरस रोग नेपालमा पनि भित्रिने सम्भावना उच्च रहेको उनले बताएका छन् ।

नेपाल प्रेस युनियन कैलालीले आज धनगढीमा आयोजना गरेको पत्रकार सम्मेलनमा उनले कोरोना रोग अत्यन्तै खतरनाक र डरलाग्दो रोग भएकाले यसको सङ्क्रमणबाट बच्न सबै दाजुभाइ तथा दिदीबहिनीलाई सचेत हुन आग्रह गरे । सभापति देउवाले भने, “यस रोगको पूर्वसावधानीका लागि भरसक हात नमिलाउने, नमस्कार गर्ने लगायतका गतिविधि गर्न आवश्यक छ ।”

सञ्चारकर्मीबाट एमसीसी विषयमा सोधिएको प्र्रश्नको जवाफमा उनले अमेरिकाबाट यति ठूलो सहयोग अहिलेसम्म नआएकाले नेपालको हित हुने एमसीसीजस्ता विषय पारित हुनुपर्ने धारणा व्यक्त गरे । उनले भने, “यसमा विरोध गरिनु हुँदैन ।” सभापति देउवाले बजेटका नाममा देशमा भ्रष्टाचार मौलाएको र कानुनी राज्यको अवधारणा भन्दा बाहिर सरकार हिँडिरहेको आरोप लगाए ।