कोरोनाको अनावश्यक हल्लाका पछि नलागौं : अर्थमन्त्री

२७ फाल्गुण, काठमाडौं । कोराेना भाइरसको प्रकोपबाट जोगिन सरकारले सर्वदलीय सहमति निर्माण गर्ने तत्परता देखाएको छ । मुलुकमा यसको खतरा नफैलियोस् भनेर सचेतना अपनाउन सक्दो प्रयास भइरहेको सन्दर्भमा सर्वदलीय बैठकको आयोजना गर्न लागिएको जानकारी सरकारका प्रवक्तासमेत रहेका अर्थमन्त्री डा. युवराज खतिवडाले दिएका छन् ।

आज सिंहदरबारमा बसेको कोभिड–१९ रोकथाम तथा नियन्त्रण उच्चस्तरीय समन्वय समितिको बैठकमा सहभागी भएका मन्त्री खतिवडाले पत्रकारसँग कुरा गर्दै यस्तो जानकारी दिएका हुन् । संभावित संक्रमणबाट जोगिन सबैखाले प्रयास गरिने जानकारी दिंदै डा. खतिवडाले भने – यसबारे सर्वदलीय बैठक गरी राष्ट्रिय सहमति बनाइने छ ।

बजारमा अनावश्यक हल्ला फैलिएकोप्रति आपत्ति जनाउँदै मन्त्री खतिवडाले भने – हामीसँग पर्याप्त मौज्दाद छ, खाद्यान्न र औषधिका लागि तत्काल कुनै समस्या पर्दैन, सर्वसाधारण ढुक्क भए हुन्छ । औषधिजन्य उत्पादनको आयातमा भारतबाट प्रतिबन्ध लगाइएको सन्दर्भमा उनले भने – यसबारे कूटनीतिक तहमा कुरा गरिने छ । हाल भन्सार बिन्दूमा रहेका सामग्री तत्कालै छुटाउने पहल शुरु भएको छ ।

उनले भने – हामीसँग अहिले नै पाँच महिनालाई पुग्ने खाद्यान्न र तीन महिनाका लागि आवश्यक औषधि मौज्दात छ, चिन्ता लिनु पर्दैन । साथै, चीनमा कोरोना भाइरस नियन्त्रणमा आउने क्रममा भएकाले नाका पनि खुल्ने र अभाव नहुने विश्वास उनले व्यक्त गरे । नागरिक तहबाट समेत सहयोग हुनुपर्ने भन्दै उनले अनावश्यक रुपमा सामान थुपार्ने प्रवृत्ति त्याग्न आह्वान गरे ।

यसैबीच सरकारले आज निजी क्षेत्रका प्रतिनिधिसँग मन्त्रालयमा गरेको छलफलमा सहयोगको लागि आग्रह गरेको छ । बैठकमा सहभागी व्यवसायीले आत्तिनु पर्ने अवस्था नरहेको स्पष्ट गरेका छन् । खाद्यान्नलगायत औषधि र पेट्रोलियम पर्याप्त मौज्दात रहेकाले अनावश्यक हल्लाका पछाडि नलाग्न सर्वसाधारणसँग आग्रह गरिएको छ ।