ओलीको जिद्धीपनले स्वास्थ्यमा जटिलता आउन सक्ने

३ चैत्र, काठमाडौं । सत्तारुढ नेकपाका अध्यक्षसमेत रहेका प्रधानमन्त्री केपी ओली १२ दिनको अस्पताल बसाईपछि सरकारी निवास बालुवाटार छिरे, गएको शुक्रबार । आफ्नै जिद्धी स्वभावले उनको बालुवाटार प्रवेश चिकित्सकले चाहे विपरित छिटो भयो ।

प्रधानमन्त्रीलाई बालुवाटार लैजानुभन्दा तत्काललाई अस्पतालमै राख्दा बढी सुरक्षित हुने उनीहरुको बुझाई थियो । तर ओली भने दुनियाँलाई आफू तन्दुरुस्त छु भन्ने देखाउन चाहन्थे । त्यसैको प्रतिफल थियो हिजो साँझ सिंहदरबारमा आयोजित सार्क नेताहरुको भिडियो कन्फरेन्स ।

दुई दिन अघि भारतीय प्रधानमन्त्री नरेन्द्र मोदीले सार्क क्षेत्रका नेताहरुलाई कोरोना भाइरसबिरुद्ध साझा लडाईं लड्न आह्वान गरेका थिए । मोदीको उक्त भनाइप्रति ओलीले सकारात्मक प्रतिक्रिया दिए । अझ औचित्यबिहिन हुने अवस्थामा रहेको सार्कको भविष्यलाई समेत व्यूताउने बुझाई धेरैको रह्यो । त्यसलाई अवसरका रुपमा सदुपयोग गर्न वर्तमान सार्क अध्यक्ष रहेको नेपालका प्रधानमन्त्रीले धारणा राख्नु स्वभाविक थियो ।

तर दुई दिनपछि मोदीको आह्वानमा गरिएको भिडियो कन्फरेन्समा ओलीको सक्रिय सहभागिता भने अनौठो र बिस्मयकारी रह्यो । चिकित्सकहरुको रायसुझाव विपरित प्रधानमन्त्री ओली हिजो करिब दुई घण्टा सिंहदरबारस्थित हलमा भिडियो कन्फरेन्समा सहभागी थिए । त्यसको प्रत्यक्ष असर उनको स्वास्थ्यमा परेको छ ।

बालुवाटार स्रोतका अनुसार, आज बिहानैदेखि प्रधानमन्त्री ओली थला परेका छन् । अस्पतालबाट बालुवाटार छिरे लगत्तै बढाइएको उनको सक्रियता आजबाट घटेको छ । आज बिहान उनले भेट्न तय गरेका कतिपय भेटघाट रद्ध गरिएका छन् । ओलीका निजी चिकित्सक डा. दिव्यासिंह शाह लगायतको टोली उनको हेरचाहमा व्यस्त छ ।

ओलीको सचिवालय सदस्य एवं पारिवारिक सदस्यलाई चिकित्सकको चर्काे गाली परेको छ । यो उमेरमा मृगौला प्रत्यारोपण भएको छ, त्यो पनि दोस्रो पटक, केही भयो भने त्यसको जिम्मा कसले लिन्छ ? तपाईहरुले त बुझ्नु प¥यो नि भन्दै डा. सिंहले प्रधानमन्त्री ओलीका सचिवालय सदस्यहरुलाई हप्काइन् । अप्रेशन गरेको कम्तिमा एकमहिना संक्रमणको उच्चजोखिम रहने भएकाले प्रधानमन्त्रीलाई पूर्णरुपमा आइसोलेसनमा राख्नु पर्ने राय उनले व्यक्त गरिन् ।

आजैबाट प्रधानमन्त्रीको भेटघाट बन्द गर्न समेत डा. शाहले आग्रह गरेकी छिन् । अब अत्याबश्यक काममा बाहेक प्रधानमन्त्रीले भेटघाट र औपचारिक कार्यक्रम नगर्ने निकट स्रोतले बतायो । प्रधानमन्त्री ओली दुनियाँका अगाडि स्वस्थ छु भन्ने देखाउन चाहन्छन्, तर उनको स्वास्थ ज्यादै कमजोर छ – उपचारमा संलग्न एक चिकित्सकले बताएका छन् ।