यूवतीकी साथीले जहाजमा सारेको त्यो कोरोना

१० चैत्र, काठमाडौं । कोरोना भाइरसमुक्त राष्ट्रको पंक्तिमा रहेको नेपाल त्यो हैसियतबाट आजबाट आफैं मुक्त भएको छ । अर्थात हिजो साँझ एकजना नेपाली युवतीमा यो संंक्रमणको पुष्टी भएपछि नेपालले आफ्नो पूर्व परिचय गुमाएको हो । साथै जनमानसमा कोरोनाप्रतिको त्राश अझै चुलिएको छ ।

काठमाडौं स्थायी घर भएकी ती श्रेष्ठ थरकी ती युवतीमा कोरोना भाइरस सार्ने काम उनीसँगै हवाईजहाजमा यात्रा गर्ने भियतनामकी महिला साथी देखिइन् । यही चैत ४ गते कतारको दोहा हुँदै बिहान साढे १० बजे त्रिभुवन अन्तर्राष्ट्रिय विमानस्थल ओर्लिएकी १९ वर्षीया ती किशोरीलाई शुरुमा त थाहै भएन । तर जब उनी घर पुगिन्, त्यसपछि भियतनामकी साथीलाई कोरोना संक्रमण भएको जानकारी पाइन्, अनि भने उनको होस हवासै उड्यो ।

मेडिकल शिक्षासँग जोडिएका घर परिवारले उनलाई तत्कालै आइसोलेसनमा राख्यो । दुई दिनपछि किशोरीलाई ज्वरो बढ्यो अनि सुख्खा खोकी लाग्न थाल्यो । तत्काल श्रेष्ठ परिवार टेकूस्थित शुक्रराज सरुवा रोग अस्पताल पुग्यो, उनको स्वाब परीक्षण गर्न नमूना दिएर घर फर्कियो । भोलिपल्ट राति अर्थात आइतवार मध्यरातमा घरमा फोन आयो, कोरोना पोजेटिभ आयो ।

त्यसपछि तत्कालै उनलाई अस्पतालबाटै एम्बुलेन्सका साथ चिकित्सक टोली लिन पुग्यो । आवश्यक प्रक्रिया पूरा गरी उनलाई अस्पतालले छुट्टै कोठामा आइसोलेसन वार्डमा राखेर उपचार थालेको छ । अवस्था राम्रो छ, सुधार भइरहेको छ ।यति भइसक्दा उनीसँगै कतार एयरको उडानमा नेपाल आएका अरु २०५ जना यात्रुको अवस्था भने अझै अज्ञात छ । उनीहरुको स्वास्थ्य अवस्थाबारे सरकारले थप खोजीनीति गर्नु आवश्यक छ ।

स्वास्थमन्त्री भानुभक्त ढकालले खोजी शुरु भइसकेको र पहिचान हुने वित्तिकै क्वारेन्टाइनमा राखिने जानकारी दिएका छन् । साथै संक्रमित युवतीका परिवारलाई समेत आइसोलेसनमा राखी निगरानी गर्न थालिएको छ ।