नेपालमा थप तीन जनामा भेट्यिो कोरोना, संक्रमितको संख्या नौ पुग्यो

२२ चैत, काठमाडौं । नेपालमा कोरोनाभाइरसको इपिसेन्टरका रुपमा सुदूरपश्चिम प्रदेश बन्ने खतरा देखिएको छ ।कञ्चनपुर जिल्लामा आज एकै दिन तीन जनामा संक्रमण पुष्टी भएपछि यस्तो खतरा बढेको हो । आज संक्रमण पुष्टी भएका मध्ये दुई जना भारतबाट आएका हुन् । एकजना भने यसअघि नै कैलालीमा संक्रमण पुष्टी भएकाका पारिवारिक सदस्य रहेको स्थानीय प्रशासनले जनाएको छ ।

स्वास्थ्य तथा जनसंख्या मन्त्रालयले तीन जनामा काेराेना भाइरसकाे संक्रमण भएको पुष्टि गरेको छ । मन्त्रालयका अनुसार सातौँ संक्रमित धनगढीका चौथो संक्रमित ३४ वर्षीय युवाका आफन्त, आठौँ मुम्बैबाट फर्किएका २१ बर्षीय पुरुष र नवौँ उत्तराखण्डबाट फर्किएका कञ्चनपुरका ४१ बर्षीय पुरुषमा कोरोना संक्रमण देखिएकाे हाे ।

पहिलो पटक नेपालमै बसेकामा पनि कोरोना भाइरसको संक्रमण देखिएको हो । आठौँ संक्रमित कैलालीका २१ वर्षीय ती युवक केही समयअघि भारतको मुम्बईबाट आएको खुलेको छ । क्वारेन्टाइनमा राखिएका उनमा शुक्रबार साँझ कोरोना पुष्टि भएको हो । त्यसैगरी नवौँ संक्रमण कञ्चनपुरका ४१ वर्षीय पुरुषमा देखिएको हो ।

उनी रोजगारीका क्रममा भारतको उत्तराखण्ड थिए । नेपाल आएपछि क्वारेन्टाइनमा राखिएका उनमा पनि शुक्रबारै कोरोना पुष्टि भएको हो । तीनैजनामा कोरोना संक्रमण पुष्टि भएपछि धनगढीस्थित सेती प्रादेशिक अस्पतालको आइसोलेसनमा उपचार थालिएको छ ।

कोरोना संक्रमित तीनैजनाको स्वास्थ्य सामान्य रहेको स्वास्थ्य मन्त्रालयले जनाएको छ । स्वास्थ्य तथा जनसंख्या मन्त्रालयका अनुसार गत मार्च १९ मा दुबईबाट भारतको नयाँदिल्ली हुँदै धनगढी आएका चौथो संक्रमित युवकबाट उनका श्रीमति पनि कोरोना संक्रमण भएको हो । यो सँगै नेपालमा कोरोना संक्रमितको संख्या नौँ पुगेको छ।