लकडाउनमा तीन सन्तानसहित घुरनी भोकै, कतैबाट पाएनन् राहत

♦ धीरुभाइ

२५ चैत्र, राजविराज । राजविराज नगरपालिकाको दक्षिणसँगै टाँसिएको रञ्जितपुर गाउँ छ । सप्तरीको बिष्णुपुर गाउँपालिका वार्ड नम्बर ६ रन्जितपुरमा सदा (मुसहर) दलितको बाक्लो बस्ती छ । उनीहरुको सम्पतिको नाममा दैनिक ज्यालादारी मजदुरी नै हो ।

कोरोना भाइरस (कोभिड १९) को संक्रमणबाट बच्न र बचाउन लकडाउन गरेपछि ती मजदुरहरुलाई गर्जो टार्न साहै् कठिन भएको छ । एकदिन कटेपछि एक जुनी कटेको अभाषका साथ उनीहरु बाँच्न विवश छन । यस्तै अवस्थाबाट गुज्रिरहेको शान्तीदेवी (घुरनी) सदालाई छाक टार्न पहाडको भेल आए जस्तै भएको छ । करिब सातवर्ष अघि श्रीमान घुरन सदा बितेपछि तीन छोराछोरीको लालनपालनको जिम्मेवारी घुरनी उपर नै थपिएको छ ।

शारीरिक रुपमा कमजोर भएपनि सानो छोराछोरीको लालनपालन गर्न गाउँघरमै अर्काको काम गरेर जसोतसो दैनिक गुजार गर्दै आएकी घुरनीलाई लकडाउनमा ती काम नपाउँदा भोकै बस्नु परेको बताइएको छ । घुरनीसँगै उनका तीन सन्तान पनि कसले कुन बेला आहारा देला बाटो टोलाईरहेका छन ।

लकडाउनको १४ दिन बित्तिसक्दापनि कसैले एकदाना अन्न नदिएको गहभरी आँसु झार्दै उनले भनिन्, गरिबको दुःख पीडा बुझ्ने कोही छैन । अहिले न कतै जान सकेको छु न कसैको घरमा काम गर्न दिएको छ । के गर्ने, चिन्ताले सताएको छ ।सामाजिक दुरी कायम राख्न मागेर खानलाउन र बस्न समस्या भएपछि निर्माणधिन दलित छात्रावास भवनमा तीन सन्तानसहित घुरनी बस्न बाध्य भएकी छिन् ।

फरक क्षमताका घुरनीको घरघडेरी नभएका कारण सदा बस्ती नजिक रहेको दलित छात्रावासको निर्माणाधिन भवनमा दुई वर्षदेखि बस्दै आएका छन् । जेठो छारो १० वर्ष, दुईवटा छोरी आठ र छ वर्षको रहेको स्थानीय समाजसेवी अशोककुमार यादवले बताए । घुरनीका छोराले नजिककै चोकमा मागेर घर लगेपछि सबैजनाले बाँडीचुडी खाने गरेको यादवले जानकारी दिए ।

फोटो क्याप्सन : भोकै बस्न बाध्य रहेको घुरनी सदा ।