नुवाकोट कांग्रेसद्धारा वृद्धवृद्धा र किसानलाई मास्क तथा स्वास्थ्य सामाग्री वितरण

१० बैशाख नुवाकोट । कोरोना भाइरस रोकथाम तथा नियन्त्रणका लागि नुवाकोट कांग्रेसले जिल्लाकाे व्यवसायिक कृषिमा संलग्न वृद्धवृद्धा र किसानका लागि मास्क वितरण गरेको छ ।

जिल्लाका सबै १२ वटा गाउँपालिका र नगरपालिकाका पार्टीका सभापतिमार्फत प्रत्येक ८८ वडा तहका नेपाली कांग्रेस सभापतिहरूमार्फत उनीहरुसम्म पुर्याउने हेतुले ८ हजार ८ सय मास्क वितरण गरिएको हो ।

पार्टीका तर्फबाट मङ्गलबार गाउँ र नगर सभापतिलाई मास्क हस्तान्तरण गरिएको छ । सो मास्क सबै वडामा दामासाहीले हुनेगरी फ्रन्टलाइनमा रहेर कृषि कर्ममा संलग्न किसान र वृद्धवृद्धालाई वितरण गरिएको कांग्रेस नुवाकोट सभापति जगदिश्वर नरसिंह केसीले नेपालबहस डटकमलाई बताए ।

नेपालबहस डटकमसँग कुरा गर्दै केसीले पार्टीले आउँदा दिनमा पनि जनताको दुःखमा सक्दो सहयोग गर्दै जाने बताएका छन् । साथै यस कार्यको लागि पार्टीलाई लगनशिल भएर सहयोग गर्ने नेपाली कांग्रेस सम्पर्क समितिका सम्पुर्ण कार्य समितिका साथीहरुमा नुवाकोट कांग्रेसले हार्दिक धन्यवाद व्यक्त गरेको छ ।

सोही अवसरमा यशाेदादेवी भगवानसिंह केसी मेमोरियल ट्रस्टले नुवाकोटको एम्बुलेस चालक १९ जनालाई पीपीई र रसुवा जिल्लाको लहरेपौवा र कालिकादेवी गाउँपालिकामा रहेका १० स्वास्थ्य चौकीलाई ५ र ५ पीपीईसमेत उक्त संस्थाका प्रमुख डा. केदार नरसिंह केसी र महासचिव जगदिश्वर नरसिंह केसीले संयुक्त रूपमा हस्तान्तरण गरेका छन् ।