आफ्नैबाट टाढिंदै प्रचण्ड

२५ वैशाख, काठमाडौं । तत्कालीन नेकपा एमाले अध्यक्ष केपी शर्मा ओलीसँग सत्ता गठबन्धनबाट थालिएको हिमचिम पार्टी एकताको तहसम्म लैजाने मुख्य खेलाडी हुन्– पुष्पकमल दाहाल अर्थात प्रचण्ड । तिनै प्रचण्ड अहिले ओलीलाई जसरी भएपनि सत्ताच्यूत गर्न न्वारनदेखिको बल लगाउँदैछन् । तर सफलता उनको हात लागेको छैन । बरु आफ्नै सहयोद्धाहरुको साथ र समर्थन चाहिँ गुमाउने अवस्थामा पुगेका छन् उनी ।

नेकपाभित्रको सत्ता संघर्षमा प्रचण्डले आफू निकट नेताहरुकै विश्वास लिन सकेका छैनन् । गृहमन्त्रीसमेत रहेका पूर्व माओवादी नेता रामबहादुर थापा ‘बादल’ त यो प्रकरणमा प्रचण्डसँग बिल्कुलै सहमत छैनन् । गएको साता प्रचण्डले बादललाई पटकपटक आपनो निबास खुमलटार बोलाएर ओलीलाई प्रधानमन्त्री र पार्टी अध्यक्षबाट हटाउन सहयोगको याचना गरे । तर बादल टसका मस भएनन् । उनले हरेक पटक एउटै प्रश्न गरे–ओलीको विकल्पमा को ? जवाफ सधैं एउटै–माधवकुमार नेपाल ।

प्रचण्डको यस्तो जवाफले बादलको मन फेरिएन । तपाईं नै ओलीको विकल्पमा उभिने हो भने मेरो पूरा साथ र सहयोग हुनेछ, तर माधवजीका लागि मेरो सहयोगको अपेक्षा नगनुहोला । गत मंसिर ४ गते प्रचण्ड र ओलीबीच भएको सहमति स्मरण गराउँदै बादलले भनेका थिए– पाँच बर्षका लागि ओलीजीलाई प्रधानमन्त्री पद छाडें भन्नुभएको थियो, बरु कार्यकारी अध्यक्षको भूमिका बलियो बनाउनतिर लागौं, ओलीजीलाई यसमा बाध्य गर्न सकिन्छ ।

बादल मात्र होइन, माधव नेपाललाई प्रधानमन्त्री बनाउने प्रस्तावमा प्रचण्ड निकट नेताहरु प्रभु साह, टोपबहादुर रायमाझीहरुसमेत सहमत हुन सकेनन् । आखिर केका लागि हामीले ओलीलाई पदच्यूत गर्ने ? प्रभु साहले समेत सोधे प्रचण्डलाई । माधव नेपाल भन्दा केपी ओली नै बरु सही होलान् भन्दै प्रभुले यस्तो कच्चा खेलमा नलाग्न उल्टै प्रचण्डलाई सुझाव दिएको निकट स्रोतको दावी छ ।

माधव नेपाललाई प्रधानमन्त्री बनाउनु भनेको हामी अहिलेको भन्दा अझै तल पुग्ने अवस्था हो भन्दै उनले यो खेलबाट पूर्व माओवादीले केही नपाउने बरु गुमाउने बताए । तर प्रचण्ड भने ओली हटाउ अभियानमा होमिइसकेका छन् । उनी अब प्वाइण्ट अफ नो रिर्टन अर्थात फर्कनै नसक्ने बिन्दूमा पुगिसकेका छन्– निकट स्रोत भन्छ ।

यस्तै तर्क आपूर्तिमन्त्री लेखराज भट्टको पनि रह्यो । ओलीलाई हटाएर माधव नेपाललाई ल्याउँदा पूर्व माओवादीलाई हुने फाइदा के हो त ? भनेर उनले सोद्धा प्रचण्ड नाजवाफ भएको पनि स्रोतले बताएको छ ।

पूर्व सभामुख कृष्णबहादुर महरा समेत अब प्रचण्डलाई साथ दिने पक्षमा छैनन् । यद्यपि ओलीको विकल्पमा माधव नेपाल ठीक हुने उनको तर्क थियो । तर अहिले यो खेलमा प्रचण्डलाई साथ दिन नसकिने उनी निकट स्रोतले जनाएको छ । यौन दुव्र्यबहार प्रकरणमा जेल बस्दा प्रचण्डले आफूलाई वास्ता नगरेकोमा उनको चित्त दुखाइ छ । यसरी हेर्दा प्रचण्ड आफ्नै समूहबाट विस्तारै टाढिंदै गएको भान मिल्छ– निकट स्रोत भन्छ ।