उदयपुरको भुल्केमा थप एक महिलामा कोरोनाको पुष्टि

२७ बैशाख, उदयपुर । उदयपुरको त्रियुगा नगरपालिका-३ भुल्केमा थप एक जनामा कोरोना भाइरसको संक्रमण देखिएको छ । यो सँगै नेपालमा कुल संक्रमितको संख्या ११० पुगेको छ ।

दोस्रो पटक संकलन गरिएको थ्रोट स्वाब परीक्षण गर्दा शनिबार थप एकजनामा संक्रमण देखिएको हो । संक्रमण पुष्टि भएकी महिला ४३ वर्षीया रहेको कोशी अस्पताल विराटनगरले जनाएको छ । यससँगै शनिबार थपिएका संक्रमितको संख्या ८ पुगेको छ । शनिबार बिहान मात्र उदयपुरका तीन, कपिलबस्तुका तीन र पर्साका एक जनामा कोरोना संक्रमण पुष्टि भएको थियो ।

तीनैजना महिला विराटनगरको कोशी अस्पताल कोभिड १९ उपचार केन्द्र भर्ना भएका छन् । संक्रमण पुष्टि भएका १८,४५ र ६५ बर्षीय महिलालाई शनिबार दिउँसो अस्पताल भर्ना गरिएको थियो । अस्पतालका अनुसार संक्रमित सबैको अवस्था सामान्य छ । भुल्केमा पहिलो पटक वैशाख ५ गते १२ जनामा कोरोना संक्रमण देखिएको थियो ।