कोरोना संक्रमितको संख्या बढेसँगै स्याङ्जा उच्च जोखिममा

२५ स्याङ्जा, जेठ । स्याङ्जामा गत दुई सातामा कोरोना संक्रमणको संख्या ह्वात्तै बढेको छ । आज १४ जना कोरोना संक्रमित थपिए सगै स्याङ्जामा कोरोना संक्रमितको संख्या ३७ पुगेको छ ।

११ स्थानीय पालिका रहेको स्याङ्जामा ४ नगरपालिकासहित ३ गाँउपालिकामा कोरोना संक्रमण देखिएको छ । कोरोना संक्रमण देखिने सबै भारतबाट आएर संम्वन्धित पालिकाको क्वारेन्टाइनमा बस्दै आएका थिए । आज देखिएका कोरोना संक्रमण मध्ये वालिङमा १३ र भीरकोट नगरपालिकामा १ पुरुष रहेका छन् । कोरोना संक्रमणको शुरुवात गरेको वालिङ नगरपालिका जिल्लाका ११ पालिकामध्ये धेरै संक्रमण देखिने पालिका बनेको छ ।

पीसीआर रिर्पोट अनुसार वालिङमा २६, चापाकोटमा ४, गल्याङमा २ र भीरकोट नगरपालिकामा १ जनामा कोरोना संक्रमण देखिएको छ भने हरीनासमा २, विरुवामा १ र कालीगण्डकी गाँउपालिकामा १ जनामा कोरोना संक्रमण देखिएको छ । आरडीटीबाट पुतलीबजारमा १ जनामा संक्रमण देखिएको जिल्ला स्वास्थ्य कार्यालय स्याङ्जाका प्रमुख यामप्रसाद शर्माले जानकारी दिए ।

आइतबार आएको रिर्पोटमा देखिएका संक्रमणमा १८ देखि ५२ बर्ष सम्मका पुरुष रहेका छन् । करिव १ हजारको हाराहारीमा जिल्लाका सबै पालिकामा भारतबाट आएका क्वारेन्टाइनमा राखिएको छ । पिसिआरको दायरा वालिङले बढाएका कारण वालिङमा कोरोना संक्रमणको संख्या धेरै देखिएको बताइएको छ । अन्य पालिकाले भने पीसीआरमा जोड दिन नसकेको बुझिएको छ । सबै पालिकाले पिसिआरमा जोड दिने हो भने स्याङ्जामा ठुलो संख्यामा कोरोना संक्रमण देखिने आंकलन गरिएको छ । कोरोना संक्रमण देखिएकाहरुलाई भीरकोट १ स्थित कालिका सामुदायीक अस्पतालमा उपचारार्थ रहेका छन् ।