घटनालाई राजनीतिकरण गर्न खोजिएको भन्दै मेयर अधिकारीले जारी गरे विज्ञप्ति, प्रमुख प्रशासकीय अधिकृत पाण्डेको पनि अलग्गै विज्ञप्ति

२७ जेठ, स्याङजा । गल्याङ नगरपालिका स्वास्थ्य शाखा प्रमुख लिलाबल्लौ भण्डारीले आत्महत्या प्रकरणमा मुछिएका मेयर भूपराज अधिकारीले घटनालाई राजनीतिकरण गर्न खोजिएको भन्दै विज्ञप्ती जारी गरेका छन् ।

सो नगरपालिकाका मेयर अधिकारीको तर्फबाट प्रेस संयोजक केपी खनालद्धारा जारी विज्ञप्तिमा भनिएको छ–“ भण्डारीले आत्महत्या गर्नुमा नगरप्रमुुुखको संलग्नता रहेको भनी केही संञ्चार माध्यमले समाचार प्रकाशन गरेपछि गल्याङ नगरपालिकाको गम्भीर ध्यानाकर्षण भएको छ । ‘हामीले सच्चा र इमान्दार कर्मचारी गुमाएका छौँ । यो शोकको घडीमा कपोकल्पित समाचार प्रकाशित गरेर राजनीतिकरण गरिनुले अनलाइन सञ्चारमाध्यमलाई चुनौती थपेको छ ।”

आफ्नो स्वास्थ्य प्रमुखको मृत्युमा मलामीसमेत नगएका गल्याङ नगरपालिकाका मेयर भूपराज अधिकारीले विज्ञप्तिमार्फत श्रद्धाञ्जली भने व्यक्त गरेका छन् । हिजो अबेर जारी गरिएको विज्ञप्तिमा गल्याङ नगरपालिकाको स्वास्थ्य शाखा संयोजकको जिम्मेवारीमा रहनुभएका सिनियर अहेब छैटौं लिलाबल्लौ भण्डारी मृत अवस्थामा भेटिनुले स्तब्ध भएको जनाइएको छ । इमान्दार, कर्तव्यनिष्ठ र तोकिएको जिम्मेवारी कुशलतापूर्वक निर्वाह गरिरहनुभएका भण्डारीको निधनले सिंगो नगरपालिकालाई अपुरणीय क्षति पुगेको मेयर अधिकारीद्धारा जारी विज्ञप्तिमा उल्लेख छ ।

यस्तै नगरपालिकाका प्रमुख प्रशासकीय अधिकृत ईश्वरीप्रसाद पाण्डेले अलग्गै अर्को विज्ञप्ति जारी गर्दै स्वास्थ्य संयोजक भण्डारीले नगरपालिकामा कुनै राजीनामा पत्र लिएर नआएको र उहाँले लिखित राजीनामा पनि नदिएको जनाएका छन् ।स्वास्थ्य सेवाका कर्मचारीको राजीनामा स्वीकृत गर्ने प्रक्रिया स्वास्थ्य सेवा विभागबाट मात्रै हुने व्यवस्था रहेको सो विज्ञप्तिमा उल्लेख गरेका छन् । पछिल्लो समय कोरोना संक्रण बिरुद्ध रोकथाममा मृतक भण्डारीले उल्लेखनीय भूमिका निर्वाह गर्दै आएको पनि विज्ञप्तिमा उल्लेख गरिएको छ। नेपालबहस डटकमलगायतका सञ्चारमाध्यममा मृतक भण्डारीको आत्महत्यालाई लिएर समाचार प्रकाशित भएपछि नगरपालिकाको तर्फबाट भन्दै मेयर, उपमेयर र प्रमुख प्रशासकीय अधिकृतले अलयअलय विज्ञप्ति प्रकाशित गरेका छन् ।

गत शुक्रवार स्वास्थ्य संयोजक भण्डारीले तनावका बीच राजीनामा लिएर गएको परिवारले जनाएका हुन् । स्वयम् मेयर अधिकारीले पनि आइतबार अनुगमनका क्रममा गल्याङ पुगेका प्रजिअ,एसपी डीएसपी र संचारकर्मीसहितको टोलीलाई भण्डारी केही दिनदेखि तनावमा रहेको जानकारी गराएका थिए । अर्कोतर्फ घटना घटेका दिनमै मृतकका छोरा तथा परिवारका अन्य सदस्यहरुले भण्डारीले आत्महत्या गर्नुपर्नाको कारक मेयर अधिकारी नै रहेको आरोप लगाएका थिए ।

गल्याङ २ बटुवाका भण्डारीले गत जेठ २५ गते आप्mनै घर नजिकै रहेको राम्सिङको रुखमा झुण्डिएर आत्महत्या गरेको जिल्ला प्रहरी कार्यालय स्याङजाले जनाएको छ । प्रहरीले थप अनुसन्धान जारी राखेको जनाएको छ । आइतबार बिहान कार्यालय जाने भन्दै घरबाट निस्केका भण्डारी दिउँसोसम्म सम्पर्कबिहीन भएपछि घरपरिवारले खोजी कार्य गरेको वडा नं २ का वडा अध्यक्ष युवक कर्मचार्यले बताएको प्रेस संयोजक केपी खनालले पठाएको समाचारमा उल्लेख गरिएको छ ।