गल्याङ नगरपालिकाको अनियमित क्रियाकलापप्रति कांग्रेस नगर समितिको खबरदारी

३ असार, स्याङ्जा । नेपाली कांग्रेस गल्याङ नगर कार्य समितिले संक्रमणको विरुद्वमा अग्रमोर्चामा क्रियाशिल गल्याङ नगरपालिकाका स्वास्थ्य शाखाका प्रमुख लिलाबल्लौ भण्डारीको रहस्यमय आत्महत्याको छानविन गर्न माग गरेको छ ।

कांग्रेसको गल्याङ नगर समितिका सभापति श्यामप्रसाद बस्यालले एक विज्ञप्ति जारी गर्दै स्वास्थ्यकर्मीको देहावसान र प्रकाशित समाचारहरुको छानविन सम्बन्धमा कानुनी राज्य र विधिको शासनको मान्यता अनुरुप न्यायिक निरुपणका लागि सम्बन्धित निकाय समक्ष माग गरेका हुन् । संचारकर्मीहरु माथि प्रशासन तथा स्थानीय सरकारबाट अनावश्यक नियन्त्रण गर्ने तथा धम्काउने कार्यहरु रोक्न माग गर्दै सभापति बस्यालले प्रेस जगतमाथि गरिने कुनैपनि प्रकारको हस्तक्षेतबाट सिंगो लोकतान्त्रिक व्यवस्था रुग्ण भई नयाँ तानाशाह शुरु हुने बताएका छन् ।

सो विज्ञप्तिमा सभापति बस्यालले घर नजिकै रुखमा झुण्डिएको (मृत) अवस्थामा भेटिएको खबरबाट स्तब्ध भई शोकाकुल परिवारजनमा हार्दिक समवेदना पनि प्रकट गरेका छन् । जारी विज्ञप्तिमा भनिएको छ–“उक्त घटनाको सन्दर्भमा विभिन्न सञ्चार माध्यमहरुमा प्रकाशित समाचारमा स्वास्थ्यकर्मीमा अतिकार्य बोझको तनाव र मानसिक दवाव भएको सन्दर्भ र यस्तो विकट भौगोलिक अवस्थिति र विषम परिस्थितिमा जोखिमका बाबजुद क्रियाशिल संचारकर्मीहरु माथि प्रशासन तथा स्थानीय सरकारबाट अनावश्यक नियन्त्रण गर्ने तथा धम्काउने कार्यहरु भएको र गल्याङ नगरपालिकाको आर्थिक परिचालन एवं कारोबारमा अनियमितता र भ्रष्ट्राचार सम्बन्धी प्रकाशित समाचारमा समेत नेपाली कांग्रेस गल्याङको गम्भिर ध्यानाकर्षण भएको छ ।”

नेपाली कांग्रेसले नगरपालिकामा भएको आर्थिक अनिमिततामाथि प्रश्न उठाई पटकपटक पारदर्शिताको लागि आग्रह गर्दा नगरपालिका प्रमुखले वेवास्ता गरेको जनाउँदै बस्यालले प्रेस जगतमाथि गरिने कुनैपनि प्रकारको हस्ताक्षेतबाट श्रृङखलाबद्व रुपमा गरिएका ऐतिहासिक आन्दोलनबाट प्राप्त उपलब्धि गुम्ने र सिंगो लोकतान्त्रिक व्यवस्था रुग्ण हुने तथा नयाँ तानाशाह शुरु हुने भएकाले यस प्रकारका हस्तक्षेपप्रति खबरदारी गरेका छन् ।

मापदण्ड अनुरुपका क्वारेन्टाइन निर्माण र व्यवस्थापन नगर्नु, आइसोलेसन र उपचारका लागि उपयुक्त अस्पतालको व्यवस्था नगरिनु, भारत लगायत विभिन्न मुलुकबाट आएका नेपाली नागरिकहरुप्रति न्युनतम मानविय व्यवहार गर्न नसक्नु जस्ता परिवेशमा संक्रमणको जोखिम निकै भयावह देखिएको अवस्था एकातिर छ भने अर्कोतिर दिनानुदिन हत्या आत्महत्याका घटनाहरु बढिरहेका छन् तर सरकार गम्भिर देखिदैन भन्दै सो विज्ञप्तिमा कोरोना भाइरस संकमण बढ्दै गएको पृष्ठभूमिमा मानविय संवेदनाको ख्याल गरी रोग नियन्त्रण गर्ने कार्यमा केन्द्रित भएर मापदण्ड अनुसारको क्यारेन्टाइन व्यवस्थापन तथा समुचित उपचार प्रबन्धका लागि ठोस र प्रभावकारी कार्य गर्न नगरपालिकाको विशेष ध्यानाकृष्ट गर्दछौं, भनिएको छ ।

विश्व समुदाय नै कोभिड–१९ (कोरोना भाइरस) संक्रमणबाट आक्रान्त भएको र नेपालमा दिनानुदिन संक्रमण बढिरहेको वर्तमान सन्दर्भमा नेपाल सरकारको अदुरदर्शिता र गैरजिम्मेवारपूर्ण भुमिकाका बावजुद सतर्कता अपनाउनु भएकोमा सम्पूर्ण दिदीबहिनी तथा दाजुभाईहरुप्रति हार्दिक आभार प्रकट गर्दै सभापति बस्यालले नगरपालिकाका क्वारेन्टाइमा रहनुभएका व्यक्तिहरुमा संकमण पुष्टि हुनेको संख्या थपिदै गएको सन्दर्भमा कोरोना भाइरस संक्रमण देखिएका उपचारत सम्पूर्ण दिदीबहिनी तथा दाजुभाईहरुको शिघ्र स्वास्थ्य लाभको कामना पनि गरिएको छ ।