ओलीलाई पार्टीबाट झट्का, सर्वोच्चबाट अर्को झट्का

१० असार, काठमाडौँ । बुधबार प्रधानमन्त्री केपी शर्मा ओलीलाई झट्कै झट्का लागेको छ । पार्टी स्थायी कमिटी बैठकमा अर्का अध्यक्ष प्रचण्डले सहमतिमा लचिलो बनेर गल्ती भएको भन्दै यही अवस्था रहे पार्टी फुट्न सक्ने चेतावनी दिएका थिए । प्रचण्डको प्रहार ओलीसम्म पुगेकै बेला सर्वोच्च अदालतले अर्को आदेश दिएको छ ।

अदालतको अवहेलना मुद्दामा प्रधानमन्त्री केपी शर्मा ओलीलाई १५ दिनभित्र सर्वोच्चमा उपस्थित हुन आदेश भएको छ । सर्वोच्चका न्यायाधीश अनिलकुमार सिन्हाको एकल इजलासले कोभिड १९ प्रकोपका कारण उत्पन्न परिस्थितिबारे अदालतले दिएका आदेशको पालना नगरिएको सन्दर्भमा प्रधानमन्त्री ओलीलाई १५ दिनभित्र आफै उपस्थित भएर जवाफ दिन आदेश दिइएको हो।

वरिष्ठ अधिवक्ता प्रकाशमणि शर्माले प्रधानमन्त्री केपी शर्मा ओलीलाई विपक्षी बनाई अदालतको अवहेलना शीर्षकमा दायर गरेको रिटमा सुनुवाइ गर्दै सर्वोच्चले यस्तो आदेश दिएको हो।

सर्वोच्चको आदेशमा २०७७ वैशाख ५ गते सरकारका नाममा जारी अन्तरिम आदेश अवज्ञा गरेको भन्ने प्रश्न उठाएर वरिष्ठ अधिवक्ता शर्माले दायर गरेको रिटमा आदेशमा उल्लेखित विभिन्न ७ वटा अन्तरिम आदेशको पालना कसरी गरिएको छ र ती आदेश पालना नगर्न कुन आदेश, निर्णय, निर्देशन दिइएको हो वा होइन भन्ने विषयमा जवाफ माग गरिएको छ।

सरकारले महान्यायाधीवक्तामार्फत् आफूविरुद्ध परेका मुद्दाको जवाफ दिने गर्दछ। तर, सर्वोच्चको यो आदेशमा प्रधानमन्त्री आफै वा कानुनी प्रतिनिधिलाई उपस्थित हुन भनिएको छ। पार्टीभित्रै तनाव बढेका बेला ओलीलाई सर्वोच्चको फैसलाले पनि तनाव थपेको छ ।