नेपालको जनसंख्या तीन करोड नाघ्यो, दुई बर्षपछि जनगणना

१२ असार, काठमाडौं । नेपालको जनसंख्या तीन करोड नाघेको छ । केन्द्रीय तथ्यांक विभागले शुक्रबार मध्यान्ह नेपालको जनसंख्या ३ करोड ६३४ जना रहेको जनाएको हो ।

विभागका महानिर्देशक नेविनलाल श्रेष्ठका अनुसार यो वैज्ञानिक आधारमा प्रक्षेपण गरिएको जनसंख्या हो । यो घडी २०६८ को जनगणनाको आधारमा सेट गरिएको हो । घडीले जन्मदर, मृत्युदर र बसाईसराई दरको आधारमा जनसंख्या देखाउँछ ।

२०६८ सालको जनगणना अनुसार नेपालको जनसंख्या २ करोड ६४ लाख ५४ हजार ५०४ थियो । १२ औं राष्ट्रिय जनगणना २०७८ असारमा हुँदैछ । दैनिक जनसंख्या वृद्धि एक हजारदेखि एक हजार एक सय रहेको विभागले जानकारी दिएको छ । जनसंख्या वृद्धिदर घट्दो क्रममा रहेको विभागका निर्देशक ढुण्डीराज लामिछाने बताउँछन् ।

यो तथ्यांकका आधारमा देखिएको भएपनि २०७८ मा जनगणना मापन गर्ने गरिन्छ । अहिलेसम्म आएको तथ्यांकअनुसार नेपालको जनसंख्या तीन करोड नाघेपनि वास्तविक जनसंख्या भने जनगणनापछि मात्रै आउनेछ ।