उद्योग वाणिज्य महासंघको वरिष्ठ उपाध्यक्षमा चन्द्र ढकालको प्यानल घोषणा

काठमाडौं । नेपाल उद्योग वाणिज्य महासंघको वरिष्ठ उपाध्यक्ष पदमा चन्द्र ढकालले प्यानलसहितको उम्मेदवारी घोषणा गरेका छन् । ढकाल समूहले बुधबार काठमाडौंमा पत्रकार सम्मेलन गरेर चुनावी प्यानलको घोषणा गरेको हो ।

वर्तमान कार्यसमितिका उपाध्यक्ष ढकाल चुनाव जितेमा वरिष्ठ उपाध्यक्ष मात्रै होइन, अर्को पटक स्वतः अध्यक्ष समेत बन्ने छन । ढकाल समूहबाट जिल्ला–नगर उपाध्यक्षमा गुणनिधि तिवारी, वस्तुगत उपाध्यक्षमा उमेशलाल श्रेष्ठ र एशोसिएट उपाध्यक्षमा रामचन्द्र संघईले उम्मेद्वारी घोषणा गरेका छन् ।

उम्मेद्वारी घोषणा गर्दै ढकालले आफ्नो प्यानल स्वतः विजयी हुने र अध्यक्ष बन्न लागेका शेखर गोल्छालाई सहयोग गर्ने बताए । तर गोल्छाको समर्थन अघोषित रुपमा ढकालका प्रतिष्पर्धी किशोर प्रधानलाई रहेको बुझिएको छ । प्रधानले केही दिनमा उम्मेद्वारी घोषणा गर्दैछन् । महासंघको चुनाव आगामी साउन २६ र २७ गते हुदैछ ।