सनराइज बैंकले ल्यायो साना व्यवसायी लक्षित एसएमई कर्जा, बार्षिक ब्याजदर ९.९५ मात्र

८ साउन, काठमाडौं । सनराइज बैंकले पनि साना उद्यमी तथा व्यवसायीलाई लक्षित गरि एकल ब्याजदरको कर्जा स्कीम सार्वजनिक गरेको छ । बार्षिक ९.९५ प्रतिशत ब्याजदरमा “सनराइज सरल एस.एम.ई कर्जा” को घोषणा बैंकले गरेको हो ।

आफूसँग ज्ञान, सीप, क्षमता र उद्यमशीलता भएका तर पूँजीको अभावले उद्यम तथा व्यवसाय सञ्चालन तथा विस्तार गर्न असमर्थ साना व्यवसायीलाई सहज तथा सरल ढंगले तत्कालै कर्जा उपलब्ध गराउने उद्देश्य राखिएको सनराइज बैंकले जनाएको छ । उक्त योजना अन्र्तगत ग्राहकले कर्जा लिन आवश्यक सम्पूर्ण कागजात बैंकमा पेश गरेको २४ कार्य घण्टामै ग्राहकलाई कर्जा प्रवाह गरिने व्यवस्था मिलाएको बताइएको छ ।

यो स्कीम अन्र्तगत ग्राहकले एक करोडसम्मको कर्जा सहुलियत ब्याजदरमा प्राप्त गर्न सक्नेछन् । यस्तै बैंकले कर्जाको लागि प्रचलित धितो आवश्यकताको लागि समेत केही छुट प्रदान गर्नका साथै यस्तो सुविधा उपयोग गर्ने व्यवसायसँग सम्बन्धित व्यक्तिहरुले निशुल्क क्रेडिट कार्डको सुविधा समेतको लाभ उठाउन सक्नेछन् ।

साना तथा मझौला उद्यमीको लागि कर लेखा तथा अन्य व्यवसायिक दक्षता अभिवृद्घिको निमित विभिन्न किसिमका परामर्श सेवा समेत उपलब्ध गराउँदै आएको जनाइएको छ । यो सुविधा देशका विभिन्न स्थानमा फैलिएका यस बैंकको १३४ शाखाहरूबाट ग्राहकले लिन सक्नेछन् ।