प्रधानमन्त्रीको कोरोना रिर्पोट नेगेटिभ

२३ साउन, काठमाडौं । प्रधानमन्त्री केपी शर्मा ओलीको कोरोना रिर्पोट नेगेटिभ आएको छ । शुक्रबार बेलुकी पीसीआर रिर्पोट नेगेटिभ आएको प्रधानमन्त्रीका प्रेस सल्लाहकार सूर्य थापाले जानकारी दिए । प्रधानमन्त्री ओलीलाई कोरोना संक्रमणको आशंका बढेपछि बालुवाटारमा ७ जना उच्च पदस्थको बिहान स्वाब संकलन गरिएको थियो ।

केही दिनअघि सातै प्रदेशका आन्तरिक मामिला मन्त्रीसँग प्रधानमन्त्री ओलीले बालुवाटारमा सामुुहिक भेटवार्ता तथा छलफल गरेका थिए । छलफल पश्चात प्रधानमन्त्री ओलीसँग सबै मन्त्रीले एकसाथ ‘ग्रुपफोटो’ समेत खिचाएका थिए । बैठकपछि जनकपुर फर्केका प्रदेश २ का आन्तरिक मामिला तथा कानुनमन्त्री ज्ञानेन्द्र यादवलाई कोरोना संक्रमण पुष्टि भयो ।

मन्त्री यादवलाई कोरोना देखिएपछि सातै प्रदेशका गृहमन्त्री र प्रधानमन्त्री ओलीलाई पनि संक्रमणको आशंका बढ्यो । सोही आशंकापछि प्रधानमन्त्री ओलीसहित बालुवाटारमा उनीसँग सम्पर्कमा पुगेका प्रधानमन्त्रीका सल्लाहकार, मन्त्री र नेताहरुको परीक्षण गरिएको हो ।

परीक्षणपश्चात प्रधानमन्त्री ओलीसहित पार्टी संसदीय दलका उपनेता सुवासचन्द्र नेम्वाङ, कानूनमन्त्री शिवमाया तुम्बाहाम्फे, मुख्य सल्लाहकार विष्णु रिमाल, विदेश मामिला सल्लाहकार राजन भट्टराई, प्रेस सल्लाहकार सूर्य थापा, प्रमुख स्वकीय सचिव इन्द्र भण्डारी गरी ७ जनाको रिर्पोट नेगेटिभ आएको थापाले जानकारी दिए ।