आईएमई लाइफको सीईओ फुयाँलले लिए सपथ

७ भदौ, काठमाडौं । आईएमई ग्रुप लाइफ इन्स्योरेन्स कम्पनीको प्रमुख कार्यकारी अधिकृतमा कवि फुयाँल नियुक्त भएका छन् । बैंकबाट आफ्नो जीवनको करियर सुरु गरेका उनले विभिन्न बीमा कम्पनीको उच्च व्यवस्थापकीय पदमा कार्यरत रहेर काम गरिसकेका छन् । फुयाँलले आज आइतबार पद तथा सपथ लिँदै आइएमई लाइफलाई उत्कृष्ट कम्पनीको रुपमा उभ्याउने प्रतिवद्धता जनाएका छन् ।

उनलाई यही भदौ २ गते बसेको सञ्चालक समितिको बैठकले आगामी चार वर्षको लागि प्रमुख कार्यकारी अधिकृतको जिम्मेवारी दिएको थियो । यसअघि फुयाँललाई प्रमुख कार्यकारीमा नियुक्त गर्ने बोर्डको निर्णयमा बीमा समितिले पनि सहमति दिएको थियो । फुयाँल यसअघि सिटिजन्स लाइफ इन्स्योरेन्समा प्रमुख बजार अधिकृत थिए । जीवन बीमामा राम्रो अनुभव, दृढ इच्छाशक्ति र प्रभावशाली व्यक्तिको रुपमा उनलाई कम्पनीले जिम्मेवारी दिएको बताएकोछ ।

यसै आर्थिक वर्षमा १५० प्रतिशतले व्यवसाय विस्तार गर्ने संकल्पसहित फुयाँलले गरेका छन् । गत आर्थिक वर्षमा कम्पनीले १ अर्ब ३७ करोड रुपैयाँ खुद बीमा शुल्क आम्दानी गरेको छ । आगामी चालु आर्थिक वर्षमा ३ अर्ब ४० करोड रुपैयाँ बीमा शुल्क आर्जन गर्ने लक्ष्य कम्पनीको छ । आइएमई लाइफ पनि आईएमई ग्रुपले प्रवर्द्धन गरेको कम्पनीमध्ये एक हो ।