मिर्मिरे लघुवित्तमा दुई कार्यकारीको पद घटुवा, नेप्से र वेभसाइटमा संचालकको नाम फरक

८ भदौ, काठमाडौं । मिर्मिरे लघुवित्त वित्तीय संस्थाले साविक कायम रहेका कार्यकारी प्रमुखहरुलाई घटुवा गर्दै नयाँ सीईओ नियुक्त गरेको छ । साविकका प्रमुख कार्यकारी अधिकृत र नायब प्रमुख कार्यकारी अधिकृत क्रमशः राजेन्द्रप्रसाद न्यौपाने र विर्खबहादुर बोहोराको पद घटुवा भएको हो ।

उनीहरुले संस्थामा घटुवा हुँदै क्रमशः नायव प्रमुख कार्यकारी र सहायक कार्यकारी प्रमुखको स्थायी जिम्मेवारी पाएका छन् । संस्थाको गत भदौ ३ गते बसेको संचालक समितिको १८७ औं बैठकले सो निर्णय गरेको हो ।

त्यस्तै १८८ औं बैठकले अर्को निर्णय गर्दै संचालकमा दुईजना नियुक्त गरेको छ । चन्द्रगढी नगरपालिका झापा स्थायी ठेगाना भएका संजयकुमार श्रेष्ठ संस्थापन समुह र हल्दीवारी गाउँपालिका झापा स्थायी ठेगाना भएका दीपकुमार श्रेष्ठ सर्वसाधारण समुहबाट संचालक नियुक्त भएका हुन् । दुवै संचालकको नाम नेपाल स्टक एक्सचेन्ज (नेप्से)मा जानकारी गराएको लघुवित्तको वेभसाइटमा भने संजय श्रेष्ठ र दिपबहादुर श्रेष्ठ कायम रहेको छ ।

त्यसै गरी गत भदौ ३ गते नै बसेको १८७ औ बैठकले अर्को निर्णय गर्दै संस्थाको प्रमुख कार्यकारी अधिकृतमा हल्दिवारी, झापा स्थायी ठेगाना भएका कुमार याक्शेलाई स्थायी नियुक्ति गरेको छ ।