फर्स्ट माइक्रोफाइनान्सको बोनस तथा लाभांश घोषणा

११ भदौ, काठमाडौं । फर्स्ट माइक्रोफाइनान्स लघुवित्त वित्तीय संस्थाले आर्थिक वर्ष २०७६/७७ को बोनस तथा लाभांश शेयर प्रस्ताव गरेको छ । संस्थाले १३.६८४ प्रतिशत लाभांश दिने घोषणा गरेको हो । कम्पनीको बुधबार बसेको सञ्चालक समिति बैठकले यस आर्थिक वर्षको नाफाबाट ९.५० प्रतिशत बोनस र ४.१८४ प्रतिशत नगद गरी कुल १३.६८४२ प्रतिशत लाभांश दिने निर्णय गरेको हो । कम्पनीले ७ करोड ६० लाख ७० हजार ४५४ रुपैयाँ बराबरको बोनस वितरण गर्नेछ । यस्तै, ३ करोड ३५ लाख ४ हजार ६८३ रुपैयाँ नगद बाँड्नेछ ।

अघिल्लो वर्ष यसले १७ प्रतिशत बोनस सेयर र कर तिर्न ०.८९ प्रतिशत नगद लाभांश दिएको थियो । हाल फर्स्टको चुक्ता पुँजी ८० करोड ७ लाख ४० हजार रुपैयाँ छ । अहिले घोषणा गरेको बोनस शेयरपछि संस्थाको पूँजी ८७ करोड ६८ लाख ११ हजार २०० रुपैयाँ पुग्नेछ । सञ्चालक समितिको निर्णय अनुमोदनका लागि नेपाल राष्ट्र बैंक र संस्थाकाे आगामी वार्षिक साधारण सभामा पेश गरिने कम्पनीले जनाएको छ ।