विद्यालयको ढोकाले कासको छोराको लियो ज्यान

◊ धीरुभाइ

१४ भदौ, सप्तरी । विद्यालयको फलामे ढोकामा किचिएर सप्तरीको रुपनी गाउँपालिका ४ छप्की भथौलस्थित कार्यालय सहयोगीको ११ वर्षीय छोराको मृत्यु भएको छ । वडा नम्बर ४ स्थित आधारभूत विद्यालय प्रवेशद्वारको फलामे ढोका झरेर किचिँदा सोही विद्यालयका कार्यालय सहयोगी चन्द्रशेखर प्रमाणिका ११ वर्षीय छोरा उपेन्द्र प्रमाणीको शनिबार राती मृत्यु भएको जिल्ला प्रहरी कार्यालय सप्तरीले जनाएको छ ।

लकडाउन तथा जारी निषेधाज्ञाका कारण विद्यालय बन्द रहदाँ सुरक्षाको लागि बुबासँगै बालक सोही विद्यालयमा बस्दै आएका थिए । टाउँको र छातीमा गहिरो चोट लागेर गम्भिर घाइते भएका बालकलाई तत्काल उपचारका लागि रुपनी गाउँपालिका २ रायपुर स्थित युनिक अस्पताल पु¥याउँदा चिकित्सकले मृत घोषित गरेको थियो ।

हिजो शनिबार दिउँसो वडा अध्यक्ष छेदी इसरले सो विद्यालयमा नेकपाको वडास्तरीय भेलाको आयोजना गरेको बताए । कार्यक्रम अबेर साँझ सकिदा सहभागिहरु फर्किए पनि ढोका खुल्लै छोडेका थिए । ढोका खुल्ला देखेपछि विद्यालयमै रहेका उपेन्द्रले ढोका लगाउने क्रममा अचानक शरीरमा झरेर सो दुर्घटना भएको बताइएको छ ।

यता गाउँपालिकाका अध्यक्ष हरेराम यादवले दुई महिनाअघि मात्र सो विद्यालयको प्रवेशद्वारमा उक्त ढोका जडान गरिएको जानकारी पाइएको जिल्ला प्रहरी कार्यालय सप्तरीका प्रवक्ता प्रहरी नायब उपरीक्षक तिलक भारतीले मृतकको शव पोष्टमार्टमका लागि गजेन्द्र नारायण सिंह अस्पताल राखिएको र घटनाबारे आवश्यक अनुसन्धान भइरहेको जानकारी दिए ।