कोरोना नलागेका २७ भन्दा धेरैकाे मृत्यु, ४ घाइते, ४९ बढी बेपत्ता
नेपालबहस संवाददाता
भदौ १८, २०७७ शुक्रबार १:४९:५१
१८ भदौ, काठमाडौं । हिजो र आज मात्रकाे मात्र तथ्यांक हेर्ने हाे भने पनि कोरोना कहरकाबीच अन्य कारणले पनि दैनिक मृत्युहुने मानिसको संख्या थोरै छैन । करेन्ट लागेर, पहिरोमा परेर, बाढीले बगाएर, दुर्घटनामा परेर लगायत विभिन्न घटना, दुर्घटनामा परी मृत्यु हुनेको संख्या आज मात्रै २७ जना भन्दा धेरै रहेको पुष्टि भएको छ।
प्राप्त समाचार अनुसार आज मोरङ, रंगेली नगरपालिका–५ रामघाट जयनपुर टोल बस्ने ५५ वर्षीय रामप्रसाद मण्डलको निधन भएको छ । आफ्नै खेतमा पानी पठाउन मोटर जोड्ने क्रममा विद्युत सर्ट भई करेन्ट लागेर बिहीबार बिहान उनको मृत्यु भएको हो ।
उता नवलपरासी (पश्चिम), सुस्ता गाउँपालिका–१ रुपौलिया बस्ने ५१ वर्षीय देवनारायण थारुको मृत्यु भएको छ । उनको गाउँपालिका फेचुवास्थित बिजुलीको पोलमा चढी बल्ब परिवर्तन गर्ने क्रममा करेन्ट लागेर अशक्त भएका थारुको चिसापानी सामुदायिक अस्पताल बर्दघाटमा उपचारको क्रममा लगिएता पनि बिहीबार बिहान मृत्यु भएको हो ।
गुल्मीको मुसिकोट नगरपालिका–५ झक्कलेस्थित बडिगाड खोलाको बिचमा एक महिलाको शव फेला परेको छ । समाचार अनुसार अन्दाजी ४० वर्षीया महिलाको नाम, थर, वतन भने खुलेको छैन ।
पाल्पामा भएको सवारी दुर्घटनामा परि एक जनाको निधन भएको छ भने दुइजना घाइते भएका छन् । रामपुर नगरपालिका–४ सिताकुण्डस्थित सडकमा प्रदेश ३-००१ अ यो ००७१ नम्बरको मिनीट्रक अनियन्त्रित भई सडकबाट करिब १ सय ५० मिटर तल खसेको थियो । आज बिहान दुर्घटना भएको मिनीट्रकमा सवार सर्लाही बागमती नगरपालिका–६ बस्ने ३० वर्षीय सन्तोष गहतराज बिकको घटनास्थलमै मृत्यु भएको थियो । दुर्घटनामा घाइते भएका सोही स्थान बस्ने १६ वर्षीय राहुल बिकलाई उपचारको लागि रामपुर अस्पता लगिएको छ भने मिनीट्रकका सामान्य घाइते चालकलाई प्रहरीले नियन्त्रणमा लिएर थप अनुसन्धान गरिरहेको छ ।
बर्दियामा डुबेर एकजनाको निधन भएको छ । गुलरिया नगरपालिका–९ स्थित पुरानो सर्जु नदीमा डुबेर सोही स्थान बस्ने बर्गदली हलुवाईको १३ वर्षीय छोरा मुराजली हलुवाईको मृत्यु भएको हो । बुधबार घरबाट खेल्न निस्केका उनी घर फर्की नआएपछि खोजी गर्ने क्रममा आज नदीमा डुबेको अवस्थामा शव फेला परेको थियो ।
काठमाडौंस्थित निर्माणाधीन धरहरा छेउमा काम गर्ने क्रममा पर्खाल भत्किएर थिच्दा आज एक जना गम्भीर घाइते भएका छन् । बाग्लुङ ढोरपाटन नगरपालिका–९ भुसुण्डे, दुनेपोखरा, लाकुरीबोटस्थित अविरल वर्षाको कारण बुधबार राति पहिरो जाँदा १० जनाकाे मृत्यु भएकाे छ भने ४१ जना बेपत्ता भएका छन् ।
बाग्लुङकै ढोरपाटन नगरपालिका–४ सोरबाङ घर भई सोही नगरपालिका–१ बुर्तिबाङ बजारमा बस्दै आएका १० वर्षिया दिलिप सिर्पालीको मृत्यु भएको छ । मृतक तिर्थलाल सिर्पालीको छोरा भएको र उनलाई हिजो खोलाले बगाएको थियो । खेल्ने क्रममा अचानक घर नजिकैको बडिगाड खोलामा खसेका उनको खोजी गर्ने क्रममा गरगरे भन्ने स्थानमा मृत अवस्थामा फेला भेटिएका थिए ।
पर्साको छिपहरमाई गाउँपालिका–५ भिष्वा बस्ने सुरेन्द्र जैसवालको माछा पोखरीमा डुबेर मृत्यु भएको छ । मृतक आत्मा कुश्वाहाको छोरा ८ वर्षीय सुजित कुश्वाहा भएको बताइएको छ ।
सुनसरी बराहक्षेत्र नगरपालिका–५ तिनकुनेस्थित धान खेतमा ३४ वर्षीया संगिता राई मृत अवस्थामा फेला परेको जानकारी प्राप्त भएको छ । प्राप्त समाचार अनुसार नवलपरासी (पश्चिम), सुनवल नगरपालिका–४ बिहारीको जंगलमा सोही नगरपालिका–६ तिल्कना बस्ने ५० वर्षीय जितेन पुनमगर बुधबार मृत अवस्थामा फेला परेका छन् । अघिल्लो दिन जंगलमा च्याउ खोज्न गएकोमा घर फर्की नआएकोले आफन्तले खोजी गर्ने क्रममा उनको शव फेला परेको हो ।
काभ्रेमा पनि एक पुरुष मृत अवस्थामा फेला परेका छन् । मण्डनदेउपुर नगरपालिका–१२ साण्डीबेशीस्थित ईन्द्रावती खोलाको छेउमा फेला परेका करिब ५५ वर्षीय पुरुषको नाम, थर, वतन भने खुलेको छैन ।
रुपन्देही गैडहवा गाउँपालिका–८ कञ्चनपुल खोलामा सोही गाउँपालिका–९ नयाँगाउँ बस्ने ५५ वर्षीया दिल कुमारी बिक बुधबार मृत अवस्थामा फेला परेकी छिन् ।
दोलखा जिरी नगरपालिका–५ स्थित चेरदुङ डांडा कालोभिरमा एक पुरुषको शव फेला परेको छ । सडीगलेको अबस्थामा बुधबार मृत फेला परेका पुरुषको नाम, थर, वतन खुल्न बाँकी रहेको प्रहरीले जनाएको छ ।
विभिन्न स्थानमा भएका सवारी दुर्घटनामा परी घाइते हुने र ज्यान गुमाउनेको संख्या झन धेरै रहेको छ । बर्दिया, महोत्तरी, नवलपरासी (पश्चिम), कपिलवस्तु र सिरहाका छुट्टाछुट्टै स्थानहरूमा भएको सवारी दुर्घटनामा परी ६ जनाको मृत्यु भएको छ भने १ जना घाइते भएका छन् ।
बर्दिया गुलरिया नगरपालिका–१२ गणेशपुरस्थित सडकमा भे–१ च १०३७ नम्बरको पिकअफ भ्यानले बुधबार साँझ साईकललाई ठक्कर दिँदा साईकलयात्री गुलरिया नगरपालिका–११ बस्ने ३५ वर्षीय अलि अहमद भाटको घटनास्थलमै मृत्यु भएको छ । पिकअप र चालकलाई प्रहरीले नियन्त्रणमा लिएको छ ।
महोत्तरी, गौशाला नगरपालिका–२ निगोल पानी ट्याङ्कीस्थित सडकमा सोही स्थान बस्ने १४ वर्षीय बालकले चलाएको साइकलबाट खसेर साइकल पछाडी सवार २२ वर्षीया निकी मण्डलको ७ महिनाको छोरा निकियम मण्डलको बुधबार दिउँसो मृत्यु भएको छ । साइकलबाट खसेर गम्भीर घाइते भएका निकियम मण्डलको प्राथमिक स्वास्थ्य केन्द्र गौशाला हुँदै प्रादेशिक अस्पताल जनकपुरमा थप उपचारको क्रममा मृत्यु भएको हो ।
त्यस्तै नवलपरासी (पश्चिम), रामग्राम नगरपालिका–११ जमुवाडस्थित सडकमा ना.२ क २०९ नम्बरको ट्रकले लु.४५ प ८७४१ नम्बरको मोटरसाइकललाई बुधबार दिउँसो ठक्कर दिँदा मोटरसाइकल चालक रुपन्देही ओमसतिया गाउँपालिका–४ बस्ने २४ वर्षीय सुरेश चौधरीको घटनास्थलमै मृत्यु भएको छ । ठक्करबाट घाइते भएका मोटरसाइकलमा सवार नवलपरासी पाल्हिनन्दन गाउँपालिका–४ बस्ने १९ वर्षीया प्रीति चौधरीको जिल्ला अस्पतालमा उपचार भईरहेको छ । दुबै सवारी साधन र ट्रक चालकलाई प्रहरीले नियन्त्रणमा लिएको छ ।
कपिलवस्तु, बाणगंगा नगरपालिका–१० गलहा पुलस्थित सडकमा लु–१ ह २६४५ नम्बरको अटो रिक्सा आफै अनियन्त्रित भई बुधबार दिउँसो दुर्घटना हुँदा अटोमा सवार रुपन्देही गैडहवा गाउँपालिका–४ पौवा बस्ने ४० वर्षीय दया शंकर चामारको घटनास्थलमै मृत्यु भएको छ । दुर्घटनामा घाइते भएका चालक सहित ४ जनाको स्थानीय यादव मेडिकल हल मिलनचोकमा उपचार भएकोमा २ जना उपचार पश्चात डिस्चार्ज भएका छन् । अटो र चालकलाई प्रहरीले नियन्त्रणमा लिएको छ ।
सिरहाको सिरहा नगरपालिका–११ भलुवाहीस्थित सडकमा स–४ प ४६१० र स.४ प ७९२१ नम्बरको दुईवटा मोटरसाइकल आपसमा ठक्कर खाई बुधबार साँझ दुर्घटना हुँदा दुवै मोटरसाइकलका चालकहरूको मृत्यु भएको छ । मृत्यु हुनेहरूमा स.४ प ४६१० नम्बरको मोटरसाइकल चालक सोही नगरपालिका–९ गुलरीया बस्ने ३५ वर्षीय सिल्टु ठाकुर र अर्का मोटरसाइकल चालक धनगढीमाई नगरपालिका–१० बस्ने ५१ वर्षीय दिपक कुमार पंजियार रहेका छन् ।
नेपालबहस संवाददाता
नेपालबहस डटकमको अंग्रेजी संस्करणका साथै अनलाइन टिभी पनि सञ्चालित छ । फेसबुक र ट्वीटरमार्फत पनि हामीसँग जोडिन सकिनेछ । नेपालबहसमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
लेखकबाट थपसुर्खेतमा बस दुर्घटना हुँदा दुई जनाको मृत्यु, २१ घाइते
जेठ ७, २०८१ सोमबार
करेन्ट लगाएर माछा मर्ने क्रममा एकको मृत्यु
जेठ ६, २०८१ आइतबार
तनहुँमा पौडी खेल्ने क्रममा डुबेर दुई युवाको मृत्यु
जेठ ५, २०८१ शनिबार
देउवा–रवी गोप्य भेटघाटः टिओआर खुकुलो बनाउने प्रस्तावप्रति ठाडै अस्वीकार
जेठ ७, २०८१ सोमबार
संसदीय इतिहासमा कलंकित दिन, २०८१ साल जेठ ७ गते
जेठ ७, २०८१ सोमबार
देउवा–रवी गोप्य भेटघाटः टिओआर खुकुलो बनाउने प्रस्तावप्रति ठाडै अस्वीकार
जेठ ७, २०८१ सोमबार
पशुपतिनाथको भेटी चोर्ने आठ जना पक्राउ
जेठ ७, २०८१ सोमबार
१० महिनामा दश हजार पर्यटक रारा पुगे
जेठ ७, २०८१ सोमबार
मौद्रिक नीति परिवर्तनमा कर्णालीको भूमिका महत्वपूर्ण : गभर्नर अधिकारी
जेठ ७, २०८१ सोमबार
१ सय सात किलो गाँजासहित कार चालक पक्राउ
जेठ ७, २०८१ सोमबार
धनगढीमा संघीय हिन्दू गणतन्त्रबारे छलफल
जेठ ७, २०८१ सोमबार