नेपालगञ्जमा ५९ बर्षीय पुरुषको मृत्यु

२२ भदौ, नेपालगञ्ज । कोरोना भाइरसको संक्रमणबाट बाँकेमा एक पुरुषको मृत्यु भएको छ । नेपालगञ्ज उपमहानगरपालिका–९ बाँकेका ५९ वर्षीय पुरुषको नेपालगञ्ज मेडिकल कलेज कोहलपुरमा उपचारका क्रममा गएराती मृत्यु भएको हो ।

भदौ १५ गते कोरोना संक्रमण पुष्टि भएपछि उनी तीन दिनसम्म नेपालगन्जकै न्यू इन्द्रेणी होटलको आइसोलेसनमा बसेका थिए । भदौ १८ गते स्वास्थ्यमा समस्या आएपछि नेपालगन्ज मेडिकल कलेज कोहलपुरमा भर्ना भएका उनको उपचारका क्रममा गएराती मृत्यु भएको हो ।

पाँच वर्षदेखि मुटु र तीन वर्षदेखि मधुमेहका रोगी रहेका उनको मुटुको रक्तनली बन्द भएपछि मृत्यु भएको थियो । यससँगै बाँकेमा मृत्यु हुने कोरोना संक्रमितको संख्या ७ पुगेको छ ।