माछापुच्छ्रे बैंकले वार्षिक साधारण सभा पुष २ मा गर्ने

१४ मंसिर, काठमाडौं । माछापुच्छ्रे बैंक लिमिटेडको वार्षिक साधारण सभा आगामी पुष २ गते बस्ने भएको छ । बैंकले गत कात्तिक ६ गतेलाई तोकेको साधारण सभा कोरोनाभाइरस संक्रमणको त्रास र चाडपर्वका कारण सभा स्थगित गर्ने निर्णय गरेको थियो ।

सभामा बैंकले ७.०३ प्रतिशत बोनस शेयर र करसहित ३.३७ प्रतिशत नगद लाभांश वितरण प्रस्ताव पारित गर्ने एजेन्डा बनाएको छ । यस्तै, सभामा अन्य उपयुक्त संस्थासँग मर्जर, एक्विजिसन गर्न तथा वैदेशिक रणनीतिक साझेदारीमा जान उपयुक्त देखिएमा सो सम्बन्धि सम्पूर्ण कार्य गर्न सञ्चालक समितिलाई अख्तियारी दिने प्रस्ताव पनि छ ।

सर्वसाधारण शेयरधनीका तर्फबाट सञ्चालक समितिमा प्रतिनिधित्व गर्ने ३ जना सञ्चालकको नियुक्ति गर्ने प्रस्ताव पनि रहेको छ । साधारण सभा तथा लाभांश वितरण प्रयोजनका लागि बैंकले असोज २२ गते बुक क्लोज गरिसकेको छ । असोज २१ गतेसम्म कायम शेयरधनीले मात्र लाभांश प्राप्त गर्न तथा सभामा सहभागी हुन पाउनेछन् । कोरोना भाइरस संक्रमणका कारण भर्चुअल रुपमा सभामा उपस्थित हुने शेयरधनीलाई मिटिङ आइडी र पासवर्ड उपलब्ध गराइने बैंकले जनाएको छ ।