हेटौंडा बस दुर्घटनामा गौलीको निधन, ८ जनाको चुरेहिलमा उपचार हुँदै

११ पुष, काठमाडौं । हेटौंडाबाट चितवनतर्फ जाँदै गरेको ना ५ ख ४६०९ नम्बरको बस दुर्घटनामा परि लमजुङ सुन्दरबजार नगरपालिका–८ का ३२ वर्षीय हरि गौलीको निधन भएको छ । पूर्वपश्चिम राजमार्गको हेटौँडा–नारायणगढ सडकखण्डअन्तर्गत बस्तिपुरमा अनियन्त्रित भई दुर्घटना हुँदा उनको मृत्यु भएको छ भने आठ यात्रु घाइते भएका छन् ।

प्रहरीका अनुसार दुर्घटनामा परी गम्भीर घाइते भएका गौलीको हेटौँडास्थित चुरेहिल अस्पतालमा उपचारका क्रममा मृत्यु भएको हो । तीव्रगतिका कारण बस पल्टिएर दुर्घटना भएको बताइएको छ । घाइते सबैको हेटौँडास्थित चुरेहिल अस्पतालमा उपचार भइरहेको छ । बसमा १८ जना सवार रहेको प्रहरीले जनाएको छ ।