चौडा सडकमा सवारीको गति तीव्र, दुई हप्तामै ८ पैदलयात्रुको मृत्यु

१८ पुष, काठमाडौं । पछिल्लो दुई हप्तामा मात्रै काठमाडौंमा ८ जनाको मृत्यु भएको छ । ट्राफिक प्रहरी महाशाखाका अनुसार पछिल्लो एक हप्तामा मात्र ललितपुरको सातदोबाटो–ग्वार्को सडकखण्डको बीएण्डबी अस्पताल अगाडि दुईजना र भक्तपुरमा एक जनाको ज्यान गएको हो ।

योसँगै पछिल्लो १५ दिनमा सडक दुर्घटनामा ज्यान गुमाउनेको संख्या ८ पुगेको छ । गत बिहीबार ग्वार्कोको बीएण्डबी अस्पताल अगाडि आकाशेपुल मुनिबाट बाटो काटिरहेका अस्पतालका दुईजना कर्मचारीले टाटा सुमोको ठक्करबाट ज्यान गुमाए । बत्तीविहीन आकाशे पुलमा हिँड्न असुविधा भएपछि सो ठाउँमा अधिकांश त्यसमुनिबाट सडक पार गर्छन् ।

माइतीघर–बानेश्वर, रत्नपार्क–भद्रकाली–सिंहदरबार खण्डको भद्रकाली लगायतको आकाशेपुल छेउबाट धेरैले असुरक्षित रुपमा बाटो काट्ने गरेको देखिन्छ । काठमाडौं उपत्यकाका अधिकांश आकाशेपुल खाली हुन्छन् । रत्नपार्क लगायत क्षेत्रका आकाशेपुल व्यापारिक अड्डा बनेका छन् ।

पैदलयात्रुको असावधानीका कारण पनि उनीहरुको ज्यान गएको प्रहरीको भनाई छ । दुर्घटना रोेक्नका लागि प्रयास भइरहेको पनि प्रहरीको भनाई छ । ट्राफिक प्रहरी महाशाखाका अनुसार जेब्रा क्रसिङ र आकाशेपुल जथाभावी बाटो काट्नेहरूमाथि असुरक्षा बढेको छ । बत्ती नभएकाले पैदलयात्रुले आकाशेपुल प्रयोग नगरेको ट्राफिक प्रहरीको ठहर छ ।

काठमाडौंका चौडा सडकमा सवारीको गति तीव्र हुन्छ । त्यसैबीचमा पैदलयात्रुले लापरबाही गर्दै बाटो काट्दा धेरै दुर्घटना हुने गरेको ट्राफिक प्रहरीले जनाएको छ । पैदलयात्री र सवारी चालकको लापरबाहीले सडक दुर्घटना बढेको ट्राफिक प्रहरीले जनाएको छ ।

दुर्घटनामा ज्यान गुमाउनेको संख्या बढीरहँदा सरकारी स्तरबाट कमीकमजोरीको कारण खोजी हुनु आवश्यक देखिन्छ । तर सरकारले सडक र सवारीमा जति लगानी गरे पनि पैदलयात्रीको सुरक्षालाई बेवास्ता गरेको छ ।