स्वास्थकर्मीबाट कोरोना खोप लगाउन सुरु

१४ माघ, काठमाडौं । नेपालमा कोरोनासंक्रमणविरुद्धको खोप अभियान आजबाट सुरु भएकोछ । पहिलो चरण अन्तर्गत आज स्वास्थकर्मी, सुरक्षाकर्मी र सरसफाईको काममा संलग्नहरुलाई दिइनेछ ।

अभियानको थालनी प्रधानमन्त्री केपी ओलीले सरकारी निवासबाटै भर्चअल माध्यमबाट गरे । अभियानको थालनी राष्ट्रपति विद्यादेवी भण्डारीको शुभकामना सन्देशबाट गरिएको थियो ।

आजबाट देशैभरि थालिएको यस अभियान अन्तर्गत राजधानीका विभिन्न ११ वटा अस्पतालमा खोप सुरु भएकोछ । जसमा टेकूस्थित शुक्रराज ट्रपिकल तथा सरुवा रोग अस्पताल, कीर्तिपुरस्थित आयुुर्वेद अनुुसन्धान तथा तालिम केन्द्र, पाटन अस्पताल, थापाथलीस्थित परोपकार प्रसूति तथा स्त्री रोग अस्पताल,महाराजगञ्जस्थित त्रिवि शिक्षण अस्पताल,भक्तपुर अस्पताल, शहीद धर्मभक्त अंग प्रत्यारोपण अस्पताल, जोरपाटीस्थित नेपाल मेडिकल कलेज, बलम्बुस्थित सशस्त्र प्रहरी अस्पताल र बाँसबारीस्थित शहिद गंगालाल अस्पतालमा यो सेवा सुरु गरिएको छ ।

उद्घाटन कार्यक्रमलाई संवोधन गर्दै स्वास्थ मन्त्री हृदयेश त्रिपाठीले आज १२ हजार स्वास्थकर्मीलाई यो खोप दिइने जानकारी दिए । पहिलो चरणको यो अभियान १० दिनसम्म सञ्चालन हुनेछ । हाल भारत सरकारले अनुदानमा दिएको १० लाख डोज खोप दिइएको हो ।