रिक्त डेपुटी गभर्नरकाे पदमा को आउँलान ?

१८ फागुन, काठमाडौं । आज मंगलबारबाट नेपाल राष्ट्र बैंकको डेपुटी गभर्नर पद रिक्त भएको छ । यसभन्दा अघि डेपुटी गभर्नर रिक्त भएको तीन महिनापछि प्रस्ताव मन्त्रिपरिषद्मा लगेका अर्थमन्त्री विष्णु पौडेलले यसपटक भने सरकारको अनिश्चितताका कारण त्यति लामो समयसम्म डेपुटी गभर्नर रिक्त नराख्ने राष्ट्र बैंकका अधिकारीहरू बताउँछन् ।

गभर्नरको सिफारिशमा अर्थमन्त्रीले दुई जना कार्यकारी निर्देशक डेपुटी गभर्नरमा नियुक्त गर्न मन्त्रिपरिषदमा प्रस्ताव लैजानुपर्छ ।

प्रतिनिधि सभा पुनर्स्थापनापछि संसदमा अविश्वासको मत ल्याए सामना गर्ने बताइरहेका प्रधानमन्त्री ओलीलाई नेपाली कांग्रेसले आडभरोसा दिएकाले दुई मध्ये एक जना डेपुटी गभर्नर नेपाली कांग्रेसको भागवण्डामा पर्न सक्ने बताइन्छ ।

देउवाको सिफारिशमा सुदुरपश्चिमको नाताले गुणाकर भट्ट र नेपाली कांग्रेससँगको निकटताले पिताम्बर भण्डारी प्रबल दाबेदार हुन् ।

राष्ट्रपति विद्यादेवी भण्डारीको सिफारिश महिला पनि भएकाले नीलम ढुंगानालाई छ । उनी प्रधानमन्त्री केपी शर्मा ओलीकी गृहजिल्लाकी भएकाले पनि उनको सम्भावना प्रबल छ ।

तर अर्थमन्त्री विष्णु पौडेल आफ्ना सल्लाहकार समेत रहेका डा. प्रकाशकुमार श्रेष्ठलाई डेपुटी गभर्नर बनाउन चाहान्छन् । त्यस्तै, अर्का कार्यकारी निर्देशक देव कुमार ढकाल पनि डेपुटी गभर्नरको तीव्र आकांक्षी हुन् ।

डा. प्रकाशकुमार श्रेष्ठले यसअघि लुम्बिनी प्रदेशको योजना आयोगको उपाध्यक्षको जिम्मेवारी समेत निर्वाह गरिसकेका छन् ।

यसअघि युवराज खतिवडा गभर्नर छँदा अन्तर्राष्ट्रिय मुद्रा कोषका कार्यकारी निर्देशकका लागि सल्लाहकारमा ढुङ्गानालाई नपठाएर राष्ट्र बैंकका कनिष्ठ कर्मचारी आफ्ना छोरीज्वाइँ रामशरण खरेललाई पठाएका थिए । यसपटक राष्ट्रपति भण्डारीले उनलाई अन्याय गर्न नहुने भन्दै प्रधानमन्त्री र अर्थमन्त्रीलाई ढुङ्गानाको नाम सिफारिश गरिसकेको बताइन्छ ।