‘न पायौं मन्त्री न रह्यौं सांसद’  जसपा चार मन्त्रीहरुको विचल्ली

१९ बैशाख, काठमाडौं । मुख्यमन्त्री शंकर पोखरेलले आइतबार अकस्मात राजीनामा दिएपछि एकसाता अघि उनको मन्त्रीमण्डलमा सहभागी हुन पुगेका जनता समाजवादी दलबाट कारवाहीमा परेका चारजना मन्त्रीहरुको विचल्ली भएको छ ।

अविश्वासको प्रस्तावमा हस्ताक्षर गरिसकेर पनि पार्टीको निर्णय विपरित लुम्बिनी प्रदेश सरकारको मन्त्री बनेको भन्दै पार्टीले उनीहरुलाई सांसद पदबाट हटाइएको थियाे  । उनीहरुलाई पुनः शपथ गराउने कुरा चलिरहेका बेला मुख्यमन्त्री पोखरेलले आज बिहान राजीनामा दिएपछि उनीहरु थप अन्योलमा परेका छन् ।

पोखरेलको राजीनामासँगै उनीहरु ‘न पायौं मन्त्री न रह्यौ सांसद’ को अवस्थामा पुगेका छन् । पार्टीले कारवाही गरेपछि उनीहरुको सांसद पद पनि रहेन भने मन्त्री पद पनि गुमेको थियो । रमाइलो कुरा त के छ भने जसपाका यी चार सांसदलाई पदमुक्त गराउन सफल भएर पोख्रेल प्रदेशसभामा बहुमत प्राप्त दलको नेता बन्दै पुन: मुख्यमन्त्री बन्ने बाटो सुरक्षित गरेका छन् ।

त्यसो त कारवाहीमा परेका चारजना सांसदहरु सन्तोषकुमार पाण्डे, विजयबहादुर यादव, सुमन शर्मा रायमाझी र कल्पना पाण्डे लम्साल सर्वोच्च जाने तयारीमा छन् । जसपाको कार्यकारिणी समितिको बहुमत सदस्यको निर्णयबाट कारवाहीमा परे पनि यता महन्थ ठाकुर र राजेन्द्र महतोले भने कारवाहीको कार्यान्वयन नगर्नु भनि निर्वाचन आयोग समक्ष निवेदन दिएका छन् । पोख्रेलले राजीनामा दिएपछिको अवस्थामा अब सर्वोच्च जाने नजाने विषयमा छलफल गर्न महन्थ ठाकुर र राजेन्द्र महतो थप छलफलमा जुटेका छन् ।