दुर्घटना र अपराधिक क्रियाकलाप हुने गण्डकीकै पहिलो जिल्ला नवलपुर

मिना कंडेल

३० साउन, नवलपुर । पुर्बी नवलपरासी दुर्घटना र अपराधिक क्रियाकलाप हुने गण्डकी प्रदेशकै पहिलो जिल्ला बनेको छ । पुर्बी नवलपरासीमा रहेका चार नगरपालिका र चार गाउँपालिकामा बिगतको बर्षको तुलनामा अपराधिक घटनामा बृद्धि भएको जिल्ला प्रहरी कार्यालय पुर्बी नवलपरासीले जनाएको छ ।

पुर्बी नवलपरासीमा बिगतको बर्षको तुलनामा २५ प्रतिशतले आपराधिक घटना बढेको प्रहरीको तथ्याकंले देखाएको छ भने यो अझ बढेर जाने अबस्था आएपछि प्रहरीले नयाँ ढंगले काम अगाडि बढाएको जनाएको छ । प्रहरीले अपराधिक घटना हुने ठाउँहरुमा समेत बढि ध्यान केन्द्रीत गरेको प्रहरी प्रमुख प्रकाश मल्लले बताए ।

यस्तै पूर्वी नवलपरासीमा एक वर्षको अवधीमा सवारी दुर्घटनामा परि ४६ जनाले ज्यान गुमाएका छन् । जिल्लामा आर्थिक वर्ष २०७७/०७८ मा भएको एक सय ३२ सवारी दुर्घटनामा परेर ४६ जनाले ज्यान गुमाएका छन् भने ती मध्य चार जना महिला र दुइ जना बालक रहेको जिल्ला ट्राफिक प्रहरी कार्यालय पूर्वी नवलपरासीको तथ्याङ्कमा उल्लेख छ ।

गत वर्ष ८६ वटा मोटरसाईकल दुर्घटनामा परेको जिल्ला ट्राफिक प्रहरी कार्यालयका सुचना अधिकारी पदम बडुले जानकारी दिनुभयो । त्यसपछि जिपकार २६ , ट्रक टेङ्कर २३ , ट्याक्टर १५ , बस १३ , टेम्पो १० , साना सवारी ८ , टिपर ५ , माईक्रो ३ र अन्य एउटा गरेर गत वर्ष जिल्लामा एक सय ९० वटा सवारी दुर्घटनामा परेको बडुले बताए ।

सबैभन्दा बढि दुर्घटनामा पर्ने मोटरसाईकल रहेको छ । दुर्घटनाको मुख्य कारणमध्ये एक चालकको लापरवाही रहेको र युवा पुस्ताहरुले बढि स्पीडमा हाक्ने, मोवाईल फोनको प्रयोग गर्ने, जस्तो ठाउँमा पनि ओभरटेक गर्ने गर्दा मोटरसाईकल बढि दुर्घटनामा पर्ने गरेको प्रहरी प्रमुख मल्लले बताए ।

यसैबीच गत वर्ष जिल्ला ट्राफिक प्रहरी कार्यालय पूर्वी नवलपरासीले एक करोड ११ लाख ५४ हजार ५ सय रुपिँया राजश्व संकलन गरेको छ । विभिन्न सवारी साधन गरि १८ हजार १ सय ४५ वटा सवारी कारवाहीबाट उक्त रकम राजश्व संकलन भएको हो ।