वालिङका बाढीपीडितलाई उपप्रमुख तिवारीमार्फत राहत वितरण

७ भदौ, स्याङ्जा । वालिङ नगरपालिकाभित्र रही प्राकृतिक विपत्तीमा परेका पीडितलाई राहत वितरण गरिएको छ । सामुदायिक वन उपभोक्ता महासंघ स्याङ्जाको अनुरोधमा एशोसिएसन अन्नपुर्ण नेपाल स्वीस नामक संस्थाले प्राकृतिक विपत्तीमा परेका पीडितहरुलाई राहत सहयोग गरेको हो ।

बाढीपहिरोबाट घरवारबिहिन, विस्थापित र अति विपन्न २५ घरपरिवारलाई चामल, दाल, नुन र तेल राहत सहयोग वितरण गरिएको सामुदायिक वन उपभोक्ता महासंघ वालिङ नगर समितिका अध्यक्ष कमलप्रसाद गैहे्रले जानकारी दिए । मानव सेवा नै सबैभन्दा ठुलो धर्म हो भन्ने नारा बोकेको एशोसिएसन अन्नपुर्णले गण्डकी प्रदेशका विभिन्न जिल्लामा बाढीपहिरोबाट बिस्थापित भएका पीडितलाई राहत वितरण गर्ने क्रममा स्याङ्जा आइपुगेको बताएको छ ।

वालिङ नगर उपप्रमुख कल्पना तिवारीको रोहवरमा संस्थाले नगरभित्र रहेका बाढीपीडितलाई राहत वितरण गरेको थियो । प्राकृतिक विपत्तीमा परिवारसहित घर गुमाएका पीडितलाई राहत वितरणले केही हदसम्म भएपनि गर्जो टरेको उपप्रमुख तिवारीले बताइन् । वालिङ नगरपालिकाले पनि बाढीपीडित नागरिकलाई खाद्यन्न, स्वास्थ्य र बासको व्यवस्थापन गरेको जानकारी दिदै उपप्रमुख तिवारीले प्राकृतिक विपत्तीमा वालिङ नगरपालिकाले ठुलो क्षती व्यहोरेको बताइन् ।

प्राकृतिक विपत चाहेर आउने होइन उपप्रमुख तिवारीले भनिन्, ‘यसको सामाना गर्ने सामाथ्र्य हामीसँग हुनुपर्छ ।’ दुखको बेला राहत आवश्यकता परेपनि बिस्तारै नयाँ जीवनमा फर्कन हाम्रो पनि कर्तव्य हुनेछ उनले भनिन् । पीडितलाई राहत सहयोग गर्ने संस्था र समन्वय गर्ने वन उपभोक्ता संस्थालाई तिवारीले धन्यवाद दिइन् ।

राहत वितरणमा वन उपभोक्ता महासंघ गण्डकी प्रदेश सदस्य ऋषिराम काफ्ले, रेडियो आँधीखोलाका अध्यक्ष नेत्रप्रसाद पाण्डे, समाजसेवी भुपराज वगाले, महासंघका उपाध्यक्ष दिपेन्द्र गैहे, संस्थाका अञ्जली क्षेत्री र सन्तोषी जिसी लगायतले विपतमा परेका नागरिकलाई सहयोग गर्नु नै धर्म भएको बताएका थिए ।

वालिङ नगरपालिकाका हरेक वडाका बाढीपीडितलाई राहत वितरण गरिएको थियो । वालिङ १ मा ५ जना, २ मा २ जना, ८ मा ४ जना, ९ मा १ जना, १० मा १ जना, १३ मा ३ जना, १२ मा १ र १४ वडामा ७ जनाले राहत पाएका हुन् । गतबर्ष वालिङ नगरपालिकामा मानविय क्षतीसहित दर्जनौ घरवारविहिन भएका थिए । एसोसिएसन अन्नपुर्ण संस्थाले मानव सेवामार्फत आमाबुवा गुमाएका वालवालिकालाई लालनपालन र अध्ययन गराउँदै सडक बालवालिकाको सेवारत काम गर्दै आएको संस्थाका सहसंचालक श्यामलाल रोकाले बताए ।