जानकी फाइनान्सको एजीएम आज, यस्ता छन् एजेण्डा

२२ फागुन, काठमाडौं । जानकी फाइनान्सको साधारण सभा आज आइतबार फागुन २२ गते बस्ने भएको छ । यसअघि फागुन ७ मा बोलाइएको सभा कोरम नपुगेपछि स्थगित भएको थियो । सभा गायत्री कुञ्ज, अतिथी सदन जनकपुरमा बस्नेछ । सभामा जानकीले १५ प्रतिशत बोनस शेयर दिने विशेष प्रस्ताव पेश गर्नेछ ।

यस्तै, ०.७८ प्रतिशत नगद लाभांश (कर प्रयोजनका लागि) दिने प्रस्ताव पनि पेश हुनेछ । कम्पनीले बोनस वितरणमा ४७ लाख ४० हजार ६०० रुपैयाँ खर्च गर्न लागेको हो ।

बोनसपछि पुँजी वृद्धि हुने भएकाले सोही बमोजिम नियमावली संशोधन गर्ने प्रस्ताव लैजाने छ । आर्थिक वर्ष २०७७/७८ को नाफा नोक्सान लगायत अन्य प्रतिवेदन पारित गर्ने प्रस्ताव पेश हुनेछ ।

चालु आर्थिक वर्ष २०७८/७९ को लागि लेखापरीक्षक नियुक्ति र पारिश्रमिक निर्धारण गर्ने प्रस्ताव पनि सभामा पेश हुनेछ । सभा प्रयोजनका लागि कम्पनीले माघ २४ गते बुक क्लोज गरिसकेको छ । माघ २३ गतेसम्म कायम सेयरधनीले सभामा भाग लिन र लाभांश पाउनेछन् ।