कमिसन नबढाए ग्याँस र पेट्रोलको बिक्री रोक्ने व्यवसायीको चेतावनी

२४ फागुन, काडमाडौं । लगातार पेट्रोलियम पदार्थको मुल्य बृद्धिहुँदा समेत सरकारले कमिसन नबढाएको भन्दै पेट्रोलियम व्यावसायीहरुले कमिसन नबढाएसम्म यसको विक्रि वितरण रोक्ने चेतावनी दिएका छन् ।

पेट्रोलियम कारोबार गर्दै आएका निजी क्षेत्रका संस्थाले ढुवानीदेखि बिक्रीसम्मको कारोबार ठप्प पार्ने चेतावनी दिदै आन्दोलनका कार्यक्रम समेत घोषणा गरेका छन् ।

व्यवसायीले पाउँदै आएको कमिसन निगम सञ्चालक समितिले कटौती गरेको भन्दै नेपाल पेट्रोलियम डिलर्स राष्ट्रिय एसोसिएसन, नेपाल पेट्रोलियम ढुवानी व्यवसायी महासंघ र नेपाल एलपी ग्याँस उद्योग संघले यस्तो बताएका हुन् ।

संयुक्त विज्ञाप्ति जारी गर्दै तीनवटै संस्थाले कमिसन कटौतीको निर्णय फिर्ता नभए चैत ६ गतेदेखि चरणबद्ध आन्दोलन सुरु गर्ने घोषणा गरेका छन् । व्यवसायीले घोषणा गरेको आन्दोलन अन्तर्गत चैत ६ गते ग्याँस उद्योगीले निगमबाट ग्याँस खरिदको अग्रिम अनुमति नलिने, चैत १० गतेदेखि रिफाइनरीबाट ग्याँस ढुवानी रोक्ने र १४ गतेबाट ग्याँसको भन्सार नछुटाउने जस्ता कार्यक्रमहरु छन् ।

यस्तै १६ गतेबाट पेट्रोलियम पदार्थको अग्रिम आयात अनुमति नलिने र चैत्र २० गतेबाट देशभर ग्याँससहित सबै खालका इन्धनको बिक्री ठप्प पार्ने व्यवसायीले चेतावनी दिएका छन् ।