बलेफी हाइड्रोपावरको आईपीओ बाँडफाँडः लक्की नम्बर नौ, तीन जनाले पाए ११ कित्ता

२९ चैत, काठमाडौं । बलेफी हाइड्रोपावर कम्पनीको आईपीओ बाँडफाँड भएको छ । कम्पनीको आईपीओ मंगलवार बाँडफाँड भएको हो । कम्पनीको आईपीओ प्रि–अलोटमन्ट भने शुक्रवार सम्पन्न भइसकेको थियो । कम्पनीले चैते १६ गतेदेखि २१ गतेसम्म १८ लाख २७ हजार ९७० कित्ता आईपीओ निष्कासन गरेको हो ।

कम्पनीले सर्वसाधारणका लागि विक्री गरिने कुल कित्ता शेयरमध्ये ४ प्रतिशत अर्थात् ७३ हजार ११९ कित्ता शेयर कम्पनीका कर्मचारीहरुका लागि र ५ प्रतिशत अर्थात् ९१ हजार ३९८ कित्ता शेयर सामूहिक लगानी कोषका लागि सुरक्षित गरी बाँकी १६ लाख ६३ हजार ४५३ कित्ता शेयर सार्वजनिक निष्कासनमार्फत विक्रीमा गरेको थियो।

कम्पनीले सर्वसाधारणको लागि छुट्याएको १६ लाख ६३ हजार ४५३ कित्ता शेयर नेपाल धितोपत्र बोर्डको निर्देशिका अनुसार गोलाप्रथाबाट बाँडफाँड हुँदा १ लाख ६६ हजार ३४५ जनाले आईपीओ पाए । तीन जनाले भने कम्पनीको ११ कित्ताको दरले आईपीओ हात पार्न सफल भए।

उक्त आईपीओमा अन्तिम दिन सम्ममा २२ लाख ६९ हजार ४१६ जनाले २ करोड ६२ लाख २२ हजार ९७० कित्ताका लागि आवेदन दिएका थिए ।