युक्रेन युद्धलाई ‘लज्जास्पद’ भन्दै राष्ट्रसंघमा कार्यरत रुसी कूटनीतिज्ञले दिए राजीनामा

१० जेठ, जेनेभा । संयुक्त राष्ट्रसंघका एक रुसी कूटनीतिज्ञले सोमबार युक्रेनमाथिको आक्रमणलाई ‘लज्जास्पद’ भन्दै राजीनामा दिएका छन् । रुसी कूटनीतिज्ञ बोरिस बोन्डारेभले रुसी राष्ट्रपति भ्लादिमिर पुटिनले युक्रेनमा “आक्रामक युद्ध विरुद्ध” विदेशी सहयोगीहरूलाई पत्र पठाउनुअघि नै उनले राजीनामा बुझाएको बताएका छन् ।

रुसी मिसनलाई सोमबार प्राप्त भएको पत्रमा बोरिसले आफ्नो राजीनामाको पुष्टि गरेका छन् । युक्रेनमा रुसी आक्रमणको मितिलाई उद्धृत गर्दै बोरिसले लेखेका छन्, “कूटनीतिज्ञको रूपमा मेरो २० वर्ष लामो करियरमा मैले विदेश नीतिमा धेरै परिवर्तनहरू देखेको छु तर यस वर्षको २४ फेब्रुअरीअघि आफ्नो देशप्रति त्यति लाज कहिल्यै महसुस गरेको थिइनँ ।”

“पुटिनले युक्रेन विरुद्ध सुरु गरेको युद्ध, वा पूरै पश्चिम विरुद्ध छेडिएको युद्ध युक्रेनी जनताको विरुद्ध मात्र नभई रुसका जनता विरुद्ध पनि गम्भीर अपराध हो,” उनले भनेका छन् । उल्लेखनीय कुरा के छ भने यस वर्ष २४ फेब्रुअरीमा रुसले युक्रेनमा आक्रमण गरेको थियो ।
हिन्दुस्तान टाइम्सका अनुसार टेलिफोनमा सम्पर्क गर्दा रुसी कूटनीतिज्ञ बोरिसले राजदूत गेन्नाडी गाटिलोभलाई राजीनामा बुझाएको बताएका छन् । बोरिसले भनेका छन्, “अहिले मेरो सरकारले जे गरिरहेको छ त्यो असह्य छ । सरकारी कर्मचारी भएको नाताले यसमा मेरो पनि कुनै न कुनै जिम्मेवारी हुन्छ र म त्यसका लागि तयार छैन ।”