सीट बाँडफाँड र उम्मेदवार चयनबारे रणनीति बनाउन कोइराला समूह जुटयो छलफलमा

१ असोज, काठमाडौं ।  निर्वाचन आयोगले समानुपातिकतर्फका उम्मेदवारहरुको बन्दसूची पेश गर्न दिएको समय घर्किदै गएपछि नेपाली कांग्रेसको कोइराला समूह उम्मेदवार चयनका लागि छलफलमा जुटेको छ । छलफल ठमेलस्थित होटल मर्स्याङदीमा चलिरहेको बताइएको छ ।

आगामी मंसिर ४ गते हुने प्रदेश र प्रतिनिधिसभा निर्वाचनको रणनीति तय गर्न छलफल सुरु भएको हो । बैठकमा सहभागी एक सदस्यका अनुसार गठबन्धनबाट सम्मानजनक सीट लिनुपर्ने र आफ्नो समूहका नेताले जित्नसक्ने क्षेत्र अन्य पार्टीलाई दिन नहुने विषयमा छलफल भइरहेको छ ।

शनिबारको छलफलमा संस्थापनइतर पक्षका वरिष्ठ नेता डा. शेखर कोइराला, उपसभापति धनराज गुरुङ, सहमहामन्त्री बद्री पाण्डे, अर्जुननरसिंह केसी, दिलेन्द्रप्रसाद बडू, बलबहादुर केसी, सहमहामन्त्री जीवन परिवार, गुरूराज घिमिरेलगायतका नेताहरु सहभागी रहेका छन् । महामन्त्री गगनकुमार थापा भने बिरामी भएका कारण उपस्थित भएका छैनन् ।

गठबन्धनमा सीट बाँडफाँड हुँदा सभापति देउवाले कोइराला समूहले जित्ने ठाउँका सीट अरु दललाई दिनसक्ने भन्दै यसमा दवाव दिनुपर्ने नेताहरुले धारणा राखेका छन् । गठबन्धनका नाममा कांग्रेसले जित्ने क्षेत्र अरुदललाई दिने षडयन्त्र भइरहेको भन्दै छलफलमा सहभागीहरुले आफ्नो समूहलाई अपमान गरिएमा रुखमाबाहेक अन्य चिह्नमा भोट नदिनेसम्मको अडान राख्नुपर्ने बताएका छन् । आफ्नो अडान कडा रूपमा राख्न नेता शेखर कोइरालालाई सहभागी सदस्यहरूले सुझाव दिएका छन् ।

कोइराला पक्षका पदाधिकारी, केन्द्रीय सदस्य, सोही समूहबाट पदाधिकारीमा पराजित, शेखर पक्षका प्रदेश सभापति पनि बैठकमा उपस्थित रहेको बताइएको छ । बैठकमा सहभागी एक नेताका अनुसार संस्थापन पक्षबाट कम्तिमा पनि ४० प्रतिशत भाग लिनुपर्ने माग उपस्थित सबैको रहेको छ । सभापति देउवाले उम्मेदवार चयनका लागि सात जनाको ‘कोर टीम’बनाएको समाचार बाहिरिएपछि कोइराला समूह पनि तातेको हो ।

कांग्रेसको १४ औँ महाधिवेशनमा सभापति लड्दा कोइराला समूहलले ४० प्रतिशत मत ल्याएको र आगामी निर्वाचनमा पनि सोही अनुसार पाउनुपर्ने माग देउवासँग राख्दै आएको छ । छलफलमा नेताहरुले जसरी पनि ४० प्रतिशत देउवासँग दबाएर लिनुपर्ने बताएका छन् । यसका लागि उक्त समूहको नेतृत्व कोइरालाले गरेकाले सभापति देउवालाई दवावमा राखेर अगाडी बढ्न उनीहरुले आग्रह गरेका छन् ।