नेपाली कांग्रेसमा रस्साकस्सी जारी, सात समूहबाट आएका नाम कार्यसम्पादन समितिले टुंग्याएर सभापतिसमक्ष पठाउने

३ असोज, काठमाडौं । नेपाली कांग्रेसले समानुपातिकतर्फका उम्मेवारको बन्दसूची तयार पार्न सात समूह बनाएर छलफल गरिरहेको छ । प्रधानमन्त्रीको सरकारी निवास बालुटारमा विहानदेखि भइरहेको समूहगत छलफलबाट उम्मेदवारहरुको नाम अहिलेसम्म छनोट भएको छैन् । सात प्रदेशको छुट्टाछुट्टै समूह बनाएर उम्मेदवारको बन्दसूची टुंगो लगाउन नेताहरु छलफलमा जुटिरहेको बताइएको छ ।

समूह गत छलफलबाट आएका नामहरुलाई कांग्रेसको कार्यसम्पादन समितिले फेरी छाँटकाँट गर्ने छ । अहिलेसम्म प्रदेश छलफल नसकिएकाले नाम समितिमा आइनपुगेको एक नेताले नेपालबहसलाई जानकारी दिए । समितिको बैठक पनि बालुवाटारमा नै बस्ने छ । समितिमा छलफल भएर छनोट भएका नाम हस्ताक्षरका लागि पार्टी सभापति शेरबहादुर देउवासमक्ष लगिनेछ ।

सबै तहबाट पारित भएका नाममा सभापति देउवाले हस्ताक्षर गरेपछि मात्र बन्दसूची तयार हुने बताइएको छ । बैठकमा सहभागी एक नेताका अनुसार सात प्रदेशको छुट्टाछुट्टै बैठक बसिरहेको छ । प्रतिनिधिसभा र प्रदेशसभा दुबैतर्फका उम्मेदवार सोमबार नै बुझाउनुपर्ने भएकाले नेताहरु छलफलमा जुटेका हुन् । साँझ पाँच बजेपनि बन्दसूची तयार नहुने देखिएको छ ।

प्रदेशका शीर्ष नेता, केन्द्रीय सदस्य, प्रदेश सभापतिहरु सम्मिलित बैठक छुट्टाछुट्टै बसिरहेको छ । प्रदेशसभाको समानुपातिक सूचीमा सहमति जुटेपछि प्रतिनिधिसभाको बन्दसूची टुंगो लगाउन पार्टीको केन्द्रीय कार्यसम्पादन समितिको बैठक बस्ने एक नेताले जानकारी दिए । कार्यसम्पादन समितिले नाम टुंगो लगाएपछि निर्वाचन आयोगमा बुझाइने ती नेताले बताए । त्यसपछि मात्रै सभापति कहाँ पठाइनेछ ।