कांग्रेसको बन्दसूचीमा डा. शेखर कोइराला पक्ष रुष्ट, पहिलो नम्बरमा विमलेन्द्र निधि [ हेर्नुहोस् सूची ]

९ असोज, काठमाडौं । नेपाली कांग्रेसले निर्वाचन आयोगमा बुझाएको समानुपातिक उम्मेदवारको बन्दसूचीमा संस्थापन इतर समुहको नामावली थोरै रहेको छ । कांग्रेसले प्रतिनिधिसभा निर्वाचनका लागि निर्वाचन आयोगमा बुझाएको समानुपातिकतर्फको बन्दसूचीमा १०९ जनाको नामावलीमा संस्थापन इतर पक्षका १३ जना मात्र रहेका छन् ।

संस्थापन इतर पक्षबाट डा. चन्द्रमोहन यादव, प्रतिमा गौतम, लीला बोखिम, टेकप्रसाद गुरुङ, केशरमान रोका, केदारनरसिंह केसी, हस्तबहादुर मल्ल, मैना रावल कार्की, उमा दाहाल, किरण कोइराला, मुख्तबहादुर महतो, नागिना यादव र मुख्ता यादव छन् ।

कांग्रेसको बन्दसूचीको पहिलो नम्बरमा विमलेन्द्र निधिको नाम छ । त्यसपछि क्रमशः फरमुल्लाह मन्सुर, जीवन परियार, डा. प्रकाशरण महत र आनन्दप्रसाद ढुंगाना छन् । प्रधानमन्त्री शेरबहादुर देउवाकी पत्नी आरजु राणा देउवा आठौं नम्बरमा र गृहमन्त्री बालकृष्ण खाँणकी पत्नी मञ्जु खाँण नवौं नम्बरमा रहेकी छिन् ।

शेखर पक्षका नेता अर्जुन नरसिंह केसीको नाम समानुपातिकतर्फ सिफारिस गरिए पनि बन्दसूचीमा राखिएको छैन । मेडिकल कलेज सञ्चालक खुमाप्रसाद अर्याल भने बन्दसूचीमा अटेका छन् ।

यता बन्दसूचीमा आफूहरुको सम्मानजनक प्रतिनिधित्व नगराइएको भन्दै डा. शेखर कोइराला पक्ष रुष्ट छ । यो समुहले शनिबार काठमाडौंमा खबरदारी सभा गरेर प्रत्यक्षको सीट बाँडफाँट र टिकट वितरणमा न्याय नभए चुनाव हारिने चेतावनी समेत दिएको छ । पार्टी सभापति शेरबहादुर देउवासँगै गठबन्धनका नेताहरुलाई समेत खबरदारी सभामार्फत खबरदारी गरेका छन् ।

‘खबरदारी सभा’मा शेखर समूहका नेता गुरुराज घिमिरेले गुटका नाममा आफ्नो वरिपरिका केही मानिसलाई अवसर दिएर पार्टी नबाँच्ने बताएका थिए । पार्टीमा न्यायोचित रुपमा टिकट वितरण भए ४०/६० को गणित आवश्यक नपर्ने उनले बताए । ‘न्यायोचित भएन भने ४० प्रतिशत भन्दा १ प्रतिशत पनि मञ्जुर छैन’, उनले भने, ‘४० प्रतिशतको भाग खोज्ने प्रतिपादक तपाईं (देउवा) हो । हामी टुलुटुलु हेरेर बस्दैनौं ।’

हेर्नुहोस् सूची