असोज १२ देखि निर्वाचन आचारसंहिता लागू गर्ने तयारी

१० असोज, काठमाडौं । निर्वाचन आयोगले असोज १२ गते बुधबारदेखि निर्वाचन आचारसंहिता लागु गर्ने तयारी गरेको छ। आयोगले आइतबार प्रधानमन्त्री शेरबहादुर देउवा, गृहमन्त्री बालकृष्ण खाण र विभिन्न १२ पार्टीका शीर्ष नेताहरूसँग निर्वाचन आचारसंहिताबारे छलफल गरेको थियो। आचारसंहिता लागू गर्ने अन्तिम तयारी स्वरुप आयोगले राजनीतिक दलका प्रमुख तथा पदाधिकारीसँग प्रतिबद्धता लिदै आएका छन् ।

आयोग स्रोतका अनुसार असोज १२ देखि निर्वाचन आचारसंहिता लागु गर्ने तयारी भइरहेको छ। निर्वाचन आचारसंहिता राजपत्रमा प्रकाशित भइसकेको छ । तर आयोग पदाधिकारीले निर्णय गरेको मितिदेखि आचारसंहिता लागू हुने निर्वाचन ऐनले व्यवस्था गरेको छ । आयोग स्रोतले भन्यो, “बुधबारदेखि आचारसंहिता लागू गर्ने तयारी छ ।”

असोज १२ देखि निर्वाचन आचारसंहिता लागू हुने भएपनि मुख्य निर्वाचन अधिकृत र निर्वाचन अधिकृतको कार्यालय असोज १५ गतेदेखि २० गतेभित्र स्थापना हुनेछ । आचारसंहितामा नेपाल सरकार, प्रदेश र स्थानीय सरकार तथा राजनीतिक दल, दलका भातृ संगठन, सञ्चारमाध्यम, कर्मचारी र संघ संगठन तथा आयोगमा कार्यरत कर्मचारीले पालना गर्न हुने नहुने बुँदाहरु समेटिएका छन् ।