जबरदस्ती करणीका आरोपित लहानका उपप्रमुख धरौटीमा रिहा

१० असोज, लहान । जर्वजस्ती करणी उद्योग मुद्दामा प्रहरी अनुसन्धानमा रहेका लहान नगरपालिका उपप्रमुख रामचलितर महतो थुनछेक सुनवाइमा एक लाख धरौटीमा आइतबार रिहा भएका छन् ।

२१ वर्षीया युवतीले आफू जागिरको खोजीमा उपप्रमुख महतोको कार्यकक्षमा जाँदा कोठाको चुकुल लगाएर जर्वजस्ती करणी गर्न खोजेको आरोप सहित असार ४ गते इलाका प्रहरी कार्यालय लहानमा मुद्दा दर्ता गराएकी थिइन । मुद्दा दर्ता भएपछि उपप्रमुख महतो फरार भएका थिए ।

भदौ २४ गते इलाका प्रहरी कार्यालय लहानमा आफैँ उपस्थित हुनुभन्दा अघि उपप्रमुख महतोले राजनीतिक जीवनलाई धरापमा पार्न यस्तो आरोप लगाइएको पत्रकार सम्मेलनमार्फत दाबी गरेका थिए।

रिहा भए लगतै उपप्रमुख महतोले भने ,‘अब मुद्दा बल्ल अदालती प्रक्रियामा गएको छ । मैले न्याय पाउने विश्वास छ । प्रहरीको नियन्त्रणबाट बाहिर निस्कको छु । अदालती प्रक्रियामा गएपछि मैले न्याय पाउनेमा विस्वस्त छु ।’ उपप्रमुख महतोलाई असोज २६ गते बकपत्रको लागि तारिख दिइएको जिल्ला अदालत सिरहाले जनाएको छ ।