रवीन्द्र मिश्रद्वारा विवेकशील साझाबाट राजीनामा, राप्रपा प्रवेशको तयारी

१० असोज, काठमाडौं । विवेकशील साझा पार्टीका निवर्तमान अध्यक्ष रवीन्द्र मिश्रले पार्टीबाट राजनीमा गरेका छन् । उनले पार्टी अध्यक्ष समीक्षा बाँस्कोटालाई आफ्नो राजीनामा पत्र बुझाएका हुन ।

सामाजिक सञ्जाल फेसबुकमा राजीनामा पत्र सार्वजनिक गरेका मिश्रले जीवनकै कठीनतम निर्णयको रुपमा आफ्नो राजनीमालाई अथ्र्याएका छन् । उनले राजीनामा पत्रमा लेखेका छन्, “लामो गृहकार्यपछि आफैंले नेतृत्व गरेको साझा, र पछि विवेकशील साझा पार्टीलाई, मार्ग परिवर्तन गरेर, फरक दृष्टिकोण बोक्ने साथीहरुको जिम्मा लगाउँदै घर घर छोडेर हिंड्नु निश्चय पनि सहज विषय होइन ।”

उनले अगाडि भनेका छन्, “राजनीति र पार्टीको प्रधान विषय राष्ट्रहित हो , सो परिप्रेक्ष्यमा गत पाँच वर्षमा मैले यो देशका लागि जे अत्यावश्यक छ भन्ने सम्झिएँ, त्यो विश्वासलाई मार्नु उचित नहुने ठानेँ । मेरो मार्ग परिवर्तन र राजीनामा त्यसैको परिणाम हो ।”

एक वर्षअघि पार्टीको वैचारिक सिद्धान्त परिवर्तन गरी हिन्दू राष्ट्र र राजसंस्था अपनाउनुपर्ने कार्यदिशा लिएका मिश्रको पार्टीभित्रैबाट अन्तरविरोध सुरु भएको थियो । उनले विवेकशील पार्टीबाट आएका मिलन पाण्डेलगायतका कारवाही गरेपछि विवेकशील साझाको विवाद छताछुल्ल भएको थियो । स्थानीय निर्वाचनमा पार्टीले गतिलो प्रदर्शन नगरेपछि उनी पार्टीको अध्यक्ष पदबाट राजीनामा दिएका थिए ।

पार्टीबाट राजीनामापछि उनी राष्ट्रिय प्रजातन्त्र पार्टी प्रवेश गर्ने तयारी गरेका छन् । उनी वरीताक्रममा राप्रपाको निर्वाचित उपाध्यक्षभन्दा मुनि रहने सहमति गरी प्रवेशको तयारी गरेको बताइएको छ ।