मतपत्र छपाइ : प्रदेश समानुपातिकको सकियो, प्रतिनिधिसभाको जारी

११ असोज, काठमाडौं । आगामी प्रतिनिधिसभा तथा प्रदेशसभा निर्वाचन अन्तर्गत प्रदेश सभाको समानुपातिकतर्फको मतपत्र छपाइ सकिएको छ । प्रतिनिधि सभाको समानुपातिकतर्फको करिब ४० प्रतिशत मतपत्र छपाइ सकिएको निर्वाचन आयोगले जनाएको छ ।

निर्वाचन आयोगका अनुसार गत् बिहीबारदेखि प्रतिनिधि सभाको समानुपातिकतर्फको मतपत्र छाप्न सुरु भएको हो । आयोगको निर्वाचन शाखाका प्रमुख ऋषिराम भुसालले प्रतिनिधिसभाको समानुपातिकतर्फ सोमबारसम्म ६० लाख ६५ हजार मतपत्र छापिएको बताए । पछिल्लो चौबीस घण्टामा १६ लाख ७४ हजार मतपत्र छापिएको हो । आयोगको आन्तरिक कार्यतालिका बमोजिम असोज २५ गतेभित्र समानुपातिकतर्फको ४ करोड मतपत्र छापिसक्नुपर्ने हो ।

आयोगका उपसचिब भुसालले भने, “प्रदेश सभाको समानुपातिकतर्फको दुई करोड एक लाख मतपत्र छपाइ सकिएको छ, प्रतिनिधिसभाको समेत आगामी सातासम्म छपाइ पुरा हुने अनुमान गरेका छौं ।”

असोज २३ गते प्रतिनिधि र प्रदेश सभाको प्रत्यक्षतर्फको उम्मेदवारको मनोनयन दर्ता हुनेछ । प्रत्यक्षतर्फको उम्मेदवारको अन्तिम नामावली प्रकाशन पूर्व नै आयोगले समानुपातिकतर्फको सबै मतपत्र छाप्ने गरी कार्यतालिका बनाएको हो । भक्तपुरस्थित जनक शिक्षा सामग्री केन्द्रको छापाखानामा उच्च सुरक्षा निगरानीमा मतपत्र छपाइ भइरहेको छ ।