कार्यदलले बुझाएको रोडम्यापमाथि गठबन्धनका शीर्ष नेताहरूबीच छलफल, साँझ सम्ममा सहमति हुने नेताहरुको दावी

११ असोज, काठमाडौं । प्रदेश र प्रतिनिधिसभा सदस्यको सीट बाँडफाँटबारे कार्यदलले तयार पारेको रोडम्यापमा सत्ता गठबन्धनका शीर्ष नेताहरूले छलफल सुरु गरेका छन् । आगामी निर्वाचनमा चुनावी तालमेल गर्ने सहमति गरेका गठबन्धन दल सीट बाँडफाँटको टुंगो लगाउन निर्णायक छलफलमा जुटेका हुन् ।

निर्वाचन आयोगले दसैंको कोजाग्रत पूर्णिमाका दिन उम्मेदवारको मनोनयन दर्ताको समय तोकेको छ । त्यसअघि नै दलहरूले सीटको भागबन्डा टुंग्याएर उम्मेदवार चयनको छलफल सुरु गर्नुपर्ने छ । गठबन्धनमा प्रतिनिधिसभाका १६५ मध्ये अधिकतम सीटमा सहमति जुटिसकेको छ भने प्रदेशसभातर्फका ३३० सीटको बाँडफाँटबारे कार्यदलले आइतबार र सोमबार छलफल गरेर त्यसबारे भएको सहमति शीर्ष नेताहरूलाई बुझाएको थियो ।

कार्यदलले दिएको रोडम्याप अनुसार मंगलबार शीर्ष नेताहरूबीच छलफल चलिरहेको छ । बिहान ११ बजेदेखि बालुवाटारमा सीट बाँडफाँटको विषयमा छलफल भइरहेको छ । आज दिनभर छलफल गरेर भएपनि सहमतिमा पुग्ने तयारी नेताहरुको छ । कार्यदलका एक सदस्यले दिएको जानकारी अनुसार गठबन्धनका शीर्ष नेताहरूबीचको छलफलले बेलुकासम्म सहमति गर्ने तयारी छ ।

उनका अनुसार गठबन्धनमा प्रतिनिधिसभाका १६५ मध्ये नेपाली कांग्रेसले ८०/८५, माओवादी केन्द्रले ४५/४७, जनता समाजवादी पार्टी र नेकपा एकीकृत समाजवादीले १५/१७ र राष्ट्रिय जनमोर्चाले २ सीट लिने गरी सहमतिको प्रारम्भिक खाका तयार भएको छ । कतिपय क्षेत्रमा भने दलहरूबीचको टकराव अझै मिलिसकेको छैन ।

प्रधानमन्त्रीसमेत रहेका कांग्रेस सभापति शेरबहादुर देउवा भने कांग्रेसलाई ८५ सीटभन्दा तलमै सहमति जनाउने पक्षमा देखिएका छन् । तर, कांग्रेस संस्थापनइतरका नेताहरूले भने सभापति देउवामाथि निरन्तर दवाव बढाइरहेका छन् । मंसिर ४ गते हुने प्रदेश र प्रतिनिधिसभा निर्वाचनको उम्मेदवारी छनोटका क्रममा संस्थापन पक्षले एकलौटी गर्न लागेको भन्दै सार्वजनिक सभादेखि विभिन्न दवावमूलक कार्यक्रम गर्दै आएको इतर पक्षले बुधबार पार्टी केन्द्रीय कार्यालयमा धर्ना दिने कार्यक्रमसमेत बनाएको छ ।