मोरङका ४ र ५ निर्वाचन क्षेत्र कांग्रेसले नपाउने, गुरु, आचार्य र अर्याललाई धक्का

१३ असोज, विराटनगर । मोरङका ६ निर्वाचन क्षेत्रको भाबण्डामा सत्ता गठबन्धन दलबीच लगभग सहमति जुटेको बताइएको छ ।  कुल ६ वटा संघीय निर्वाचन क्षेत्र रहेको मोरङमा कांग्रेसले ४ वटा क्षेत्र पाएको छ । नेकपा माओवादी केन्द्रले दावी गरेको क्षेत्र नं ४ र ५ मा भने अझै विवाद देखिएको छ ।

क्षेत्र न. ५ मा जनता समाजवादी पार्टी (जसपा) समेत दावी गरेकाले यो क्षेत्रमा माओवादी र जसपाबीच सहमति हुन बाँकी छ । यी दुई क्षेत्र बाहेक कांग्रेसले लिएको छ । मोरङ ४ मा कांग्रेस नेता महेश आचार्य र गुरुराज घिमिरेले मुख्य दावी गरेका थिए । क्षेत्र नं ५ मा कांग्रेसका अमृत अर्यालको मुख्य दावी रहेको थियो ।

यी दुवै क्षेत्र कांग्रेसले नपाउने भएपछि उनीहरुको उम्मेदवार बन्न चाहनामा धक्का लागेको छ । नेपाली कांग्रेस मोरङका जिल्ला सभापति डिगबहादुर लिम्बूले मोरङमा निर्वाचन क्षेत्र नम्बर ४ र ५ माओवादीले प्राप्त गर्ने जानकारी दिएका छन् । उनले यो विषयमा लगभग सहमति भइसकेको बताए ।

गुरु र आचार्यले दावी गरेको क्षेत्र नम्बर ४ मा ०७४ को निर्वाचनमा बाम गठबन्धनबाट माओवादी केन्द्रका अमनलाल मोदी निर्वाचित भएका थिए भने अर्यालले दावी गरेको मोरङ ५ मा माओवादीकै शिवकुमार मण्डल विजयी भएका थिए । ती दुबै क्षेत्रमा कांग्रेसले दाबी गर्दै आएको थियो । कांग्रेसले निर्वाचन क्षेत्र नम्बर १, २, ३ र ६ प्राप्त गर्नेछ । उनका अनुसार प्रदेश निर्वाचन क्षेत्र कसले कति लिने भन्ने विषयमा भने सहमति भएको छैन् ।

४ नम्बर क्षेत्रमा कांग्रेसका नेता महेश आचार्य अहिले पनि चुनावी अभियानमै रहेका छन् । ५ नम्बर क्षेत्रमा नेता अमृत अर्यालले दाबी गरेका थिए । अर्यालको नाम दुबै क्षेत्रबाट प्रतिनिधिसभा सदस्य पदका लागि सिफारिस भएको छ । यता, मोरङ ५ मा भने आफूहरूको जनाधार राम्रो भएकाले त्यो क्षेत्र प्राप्त गर्नुपर्ने जसपाले दाबी गरिरहेको छ । गठबन्धनबाट आफूहरूले टिकट नपाए एकल रुपमा उमेदवारी दिने जसपाको दावी छ ।